Reperi shqiptar, Stresi po përballet me një lumë akuzash pas arrestimit dy ditë më parë dhe lënies së tij në burg.
Ai akuzohet për trafik droge dhe krime kundër personit, por këto akuza i ka hedhur poshtë avokati i Stresit, Marash Ibraj i cili ka deklaruar sot në seancë se arrestimi është i paligjshëm.
Sipas tij, klienti është ndaluar në një dhomë hoteli dhe ka dënuar ashpër publikimin e pamjeve nudo nga ana e policisë së Shtetit.
Por akuzat ndaj reperit shtohen edhe më tej me një deklaratë të gazetares Klodiana Lala për “BalkanWeb”.
Sipas saj, prokuroria duke mbrojtur arrestimin e Stresit ka thënë se emri i tij ka dalë gjatë hetimeve për bandën e Bajrajve, ku reperi ka folur me një prej anëtarëve të bandës duke i kërkuar ndihmë për ta nxjerrë jashtë shtetit.
“Më ndihmoni të iki jashtë se policia po me përgjon, se sa pashë që po më afroheshin unë e hodha armën”, ka thënë në telefonatën e bërë me një nga anëtarët e bandës Bajraj, Stresi, bisedë e përgjuar nga prokuroria e Krimeve të Rënda.
Kjo telefonatë ka ndodhur më herët, pasi pak javë më parë është gjetur një armë te shkolla “Partizani” në Tiranë, në lagjen e Stresit. Me sa duket, reperi nuk i kishte mbyllur hesapet me policinë dhe e priste të ndodhte një gjë e tillë.
