Shqipëria nuk është përfshirë në listën e vendeve për të cilat hapen kufijtë e jashtëm të Bashkimit Europian prej 1 korrikut.
Këshilli i BE-së ka miratuar listën e vendeve që do u hiqet kufizimi i udhëtimit dhe në këtë listë nuk është Shqipëria.
Mirëpo për Pëllumb Piperon ky vendim i BE për të veçuar Shqipërinë nga lista e vendeve të vizitueshme është i nxituar, duke u shprehur i bindur se ky vendim është i pabazuar në të dhëna reale.
Mjeku tha në një intervistë për Euronews se kanë qenë të sinqertë në shifrat që kanë dhënë, pasi në këtë situatë e vërteta është më rëndësishme se statistika dhe kjo sipas tij na ka penalizuar në vendimin e BE.
“Situata tek ne nuk është në atë nivel që rrezikon shëndetin e qytetarëve në vendet fqinje. Ne kemi një numër shumë të vogël, në raport me komunitetin jashtë Shqipërisë. E them si specialist i shëndetit publik nuk rrezikohet shëndeti i askujt pse vjen në Shqipëri. Mjafton të mbajmë maskën e të ruajmë distancën. Tek ne, për shkak të strategjisë së gjurmimit të rasteve dhe tamponimit edhe të kontakteve, ky numër del relativisht i madh. Në vendet e tjera tamponi nuk i bëhet kontakteve, vetëm rasteve klinike. Ne kemi qenë të sinqertë në shifrat që kemi dhënë, pasi në këtë situatë e vërteta është më rëndësishme se statistika”, tha mjeku infeksionist.
Pipero këshilloi se në këtë situatë kur dielli, ajri, gjumi, ushqimi i shëndetshëm janë të rëndësishëm për të mundësuam imunitetin, secili mund të bëjë pushimet që ka planifikuar në det, por gjithmonë duke u ruajtur e duke ruajtur të tjerët.
Gjatë 24 orëve të fundit në vendin tonë janë shënuar 69 raste të reja me COVID-19, ndërsa 4 qytetarë, mes tyre edhe një mjek, kanë humbur jetën.
