25-vjeçari Klajdi Qato shpëtoi mrekullisht nën rrënojat e hotelit të tij “Vila Palma” në Shkëmbin e Kavajës.
Ai ndodhej së bashku me dy gjyshërit mbrëmjen e të hënës në hotel dhe të nesërmen do të fluturonte drejt të fejuarës së tij.
Mirëpo, tërmeti 6.3 ballë i mëngjesit të së martës ka shembur hotelin e tij, duke e zënë Kladin nën rrënoja.
Gjyshja e tij arriti të shpëtonte, ndërsa gjyshi fatkeqësisht humbi jetën.
Klajdi luftoi për orë me radhë për të dalë i gjallë nga rrënojat, ndërsa zjarrfikësit e pranishëm në vendin e ngjarjes treguan si e ndihmuan të riun të shpëtonte.
“Kam komunikuar me Klajdin për më shumë se 7 orë. I preka këmbët. Isha i lodhur pushoja nën rrënoja. Kur pushoja unë, më pyeste: A do punoni prapë? I thoja që po, i thosha: Po pushoj pak, pusho edhe ti se në hotel je. I jepja kurajo. Kur dolli më në fund na e shpërbleu. Nuk mendoja asgjë në ato momete, vetëm Klajdin. Ishte një taksixhi aty që ka bërë një punë të mrekullueshme. Kemi qënë sipër rrënojave dhe dëgjuam më pas zërin e tij, me orientim hapëm rrënojat me dorë e ça mundëm. Po ecnim nën rrënoja diku 7 metra. Kur arritëm afër Kladit, ai ishte nën krevat. Atje nuk mendon kujdes, menduam vetëm Klajdin. Në ato momente nuk e mendojmë jetën. Na pyeste gjithë kohës, kishte shumë fuqi na ka ndihmuar edhe ai. Kur doli u çua direkt. Doli në këmbë. Ai ka pasur 5 soleta sipër,”- kanë treguar zjarrfikësit në “Historia ime” në “Tv Klan.”
