“Kam provuar urinë, mbërrita në Itali në 1998-ën pa një lirë në xhep, i njoh mire këto probleme, kështu që vendosa që pakot me bukë t’i lija jashtë furrës, duke menduar që njerëzit kanë turp të kërkojnë ushqim, dhe ishte mire t’i lija veçmas”.
Kështu shprehet Edmond Prenga një 39-vjeçar shqiptar që mbërriti në Itali si emigrant, ndërsa tani është pronar i një furre buke në Romë.
Sot në kushtet kur Italia është goditur shumë nga epidemia e koronavirusit, me qindra të vdekur çdo ditë, ai ka vendosur t’u vijë në ndihmë njerëzve në nevojë.
Edmondi shprehet se ne shqiptarët e njohim shumë mirë varfërinë, ndërsa shpjegon arsyet e këtij gjesti që bën:
“U rritëm me mitin e Italisë që fëmijë në Shqipëri, kemi ëndërruar të vinim këtu. Marrëdhënia me ju italianët është e fortë. Ne shqiptarët e njohim varfërinë, sot po rimëkëmbemi, por nuk ka qenë gjithmonë kështu. Unë mendoj se Edi Rama bëri një gjë të bukur, e cila tregon zemrën e madhe të shqiptarëve dhe lidhjen me Italinë”, thotë ai sipas gazetës Shekulli.
Vendimi i qeverisë për të dërguar 30 mjekë dhe infermierë në vendin fqinj është mirëpritur nga Italia dhe mjaft personazhe të njohur politike apo të kultuarës e kanë përgëzuar këtë gjest publikisht.
Shumë nisma të shqiptarëve që jetojnë në Itali po bëhen publike gjithnjë e më shumë në media, për të treguar solidaritetin e popullit tonë, bujarinë dhe zemrën e madhe që na karakterizon.
/Iconstyle.al
