Drejtori i Përgjithshëm i Policisë së Shtetit Ardi Veliu, me anë të një konference për shtyp, ka bërë me dije se nga dita e enjte, të gjitha kapacitetet e Policisë së Shtetit, do të jenë në terren për zbatimin e urdhrit të Ministrisë së Shëndetësisë dhe Institutit të Shëndetit Publik, për mbajtjen e maskës në ambientet e hapura.
Policia e Shtetit do të angazhohet me të gjitha kapacitetet e saj, në krah të strukturave të tjera, për të garantuar zbatimin e masave të caktuara nga autoritetet e Shëndetësisë.
Patrullat policore do të monitorojnë në mënyrë rigoroze të gjithë ambientet dhe hapësirat publike ku nga e enjtja do të jetë detyrim mbajtja e maskës.
Kategoritë e personave që nuk mund të mbajnë maskën e detyrueshme:
Personat me astmë
Personat që vuajnë nga klaustrofobia,
Personat që janë me ankthi
Persona që vuajën nga alergjia
Por kushti është që këta individë duhet të marrin raport te mjeku i familjes
Deklaratat paradoksale të kryeministrit dhe ekspertëve!
Nëse ju kujtohet vetë kryeministri Rama trumpetonte nga foltorja e Kuvendit në mars se mbajtja e maskave në rrugë nuk sjell asnjë dobi.
Me sigurinë e një eksperti, ai deklaronte asokohe se maskat nuk na mbrojnë dhe se harxhojmë lekë kot nëse i blejmë, sikundër mund ta shihni në videon e mëposhtme.
Mirëpo, siç thotë edhe një fjalë e urtë “Kurrë mos thuaj kurrë”. Me kalimin e muajve, mendimi i kryeministrit ndryshoi dhe në 15 korrik qeveria vendosi mbajtje e detyrueshme të maskave në vendet e mbyllura.
Ndërsa vetëm një ditë më parë, kreu i qeverisë kaloi në polin tjetër të asaj që deklaronte 7 muaj më parë, duke vendosur mbajtjen e maskave edhe në rrugë, duke nisur nga e enjtja.
Nuk e dimë se përse është zgjidhur pikërisht kjo ditë për vënien në jetë të këtij vendimi, kur në fakt e sotmja nuk është më pak e rrezikshme se e enjtja.
Po ashtu, gjatë gjithë verës janë lajmëruar shifra ekstreme të prekurish nga Ministria e Shëndetësisë, duke paraqitur një situatë goxha serioze dhe përsëri pyesim, përse ky vendim nuk është marrë më herët?
Vlen të theksohet po ashtu se edhe ekspertët janë(ose kanë qenë) të mendimit se mbajtja e maskave në rrugë nuk mund të na mbrojë.
Gjobë të enjten, falje të premten
Më 8 tetor, qeveria fali të gjitha gjobat e vendosura gjatë 7 muajve të pandemisë. Të gjithë ata që kanë shkelur masat anti-COVID, përfshirë këtu edhe kur vendi ka qenë në karantinë totale, janë falur. Bëhet fjalë për gjobat e vendosura nga 17 prilli deri në 7 tetor.
Deri më 15 nëntor do të kthehen të gjitha paratë e gjobave të paguara, patentat dhe makinat e bllokuara dhe po ashtu janë falur edhe gjobat e vendosura ndaj familjeve të prekura nga 2 tërmetet (21 shtator dhe 26 nëntor 2019) që kanë bërë punime në banesat e dëmtuara.
Në dukje falja e gjobave është një lajm i mirë- pikërisht këtu lindin problemet.
Së pari, duket se pandemia po përdoret nga qeveria si një mundësi për t’ua marrë kalanë nga brenda qytetarëve. Kjo po bëhet pikërisht nëpërmjet faljes së gjobave, që shitet si një e mirë e madhe që po u bëhet atyre. Sidomos, duke marrë parasysh faktin se në prill, shqiptarët do shkojnë drejt kutive të votimit. Pra, mundësitë që edhe këto gjoba tu falen pas disa muajsh janë të shumta.
Së dyti, falja e gjobave shkakton në sytë e qytetarëve mungesë serioziteti. Sikur mos të mjaftonte fakti se qeveria merr vendime kontraditore, fakti që gjoba e marrë sot falet nesër bën që qytetarët mos të kuptojnë rëndësinë e vendimit. Sigurisht, flasim këtu nëse ka ndonjë rëndësi ky vendim.
Si do i blejnë shqiptarët maskat që kushtojnë sa më s’ka?
Një gjë dihet me siguri se pandemia e ka goditur rëndë ekonominë shqiptare, por jo vetëm. Djetëra mijëra të papunë, 3 muaj izolim, biznese të gjunjëzuara- një panoramë aspak optimiste, ku çdo qindarkë vlen shumë më shumë se më parë.
E sikur mos të mjaftonte kjo, tashmë duhet të blejmë edhe maskat që për ironi të fatit kushtojnë më shumë se kudo.
Një maskë kirurgjikale njëpërdorimshe kushton minimumi 50 lekë (të reja), dhe për 7 ditë të javës një që personi i duhet të dalë çdo ditë nga shtëpia i duhet të shpenzojë të paktën 350 lekë, që në një muaj konvertohen në 1400 lekë. E kjo kosto më pas dyfishohet, trefishtohet etj. në varësi të numrit të anëtarëve për familje.
Ndërkohë, nëse këto maska, që të paktën në eBay kushtojnë 0.15 dollarë, do ishin një kosto tepër e vogël dhe shumë e domosdoshme nëse do mbuloheshin nga shteti.
Mirëpo, qeveria lajmëroi thjesht detyrimin për mbajtjen e maskave, kurse detyrimet e saj i harroi.
Nuk dimë të themi me siguri nëse fushata ka ndikuar në këtë vendim të qeverisë, por që është i mangët kjo është pak por e sigurtë.
