Të paktën 15 persona u vranë në një sulm nga një sulmues i armatosur në sheshin Jan Palach të Pragës. Një i ri 24-vjeçar, i identifikuar si David Kozak sulmoi në katin e katërt të ndërtesës së Fakultetit të Arteve të Universitetit Charles dhe më pas u zhvendos në korridorin e ndërtesës, nga ku qëlloi mbi njerëzit në rrugë drejt urës Mánes.
Drejtori i policisë Martin Vondrášek bëri të ditur se më herët Policia gjeti të vdekur babain e sulmuesit në Hostoun, ku i riu u largua për të qëlluar në Pragë pasdite, shkruajnë mediat çeke.
Informacioni për identitetin e vrasësit masiv filloi të përhapet në rrjetet sociale menjëherë pas sulmit. Sipas fotografive të bëra nga dëshmitarët në vendngjarje, sulmuesi ishte i veshur me rroba të errëta dhe po qëllonte nga një vendkalim me një armë.
Sakaq mediat çeke bëjnë me dije se policia ishte vënë në ndjekje të autorit, pasi kishin konstatuar se kishte vrarë të atin e tij brenda në banesë.
Dyshimet e policisë ishin se ai mund të kryente vetëvrasje pas aktit të rëndë, teksa i ishin vënë pas duke shkuar në Universitet.
Policia u drejtua në një sallë auditori, ku autori do duhej të ishte për të ndjekur mësimin pasi ishte student në këtë Universitet por, i riu është futur në një tjetër sallë, duke u shpëtuar kështu efektivëve.
