Jam një vajzë 24 vjeç dhe kam dy fëmijë. Me bashkëshortin kemi marrëdhënie shumë të mira, por tani është në burg. Në jetë kam kaluar shumë vuajtje, jo nga ana financiare, por nga probleme të tjera, jam mërzitur aq shumë sa ditë e natë vetëm qaj. Të gjithë më thonë “bëhu e fortë”, por nuk po bëhem dot, jam lodhur shumë, po vuaj shumë, sepse jemi shumë të lidhur pas njëri-tjetrit. Dua vetëm të qaj, sepse nuk ka drejtësi, por e mbajnë kot, nuk di çfarë të bëj, ku të drejtohem. Duan ta mbajnë tim shoq aty, vetëm sepse është një person me emër në qytetin e Korçës. Ju lutem, më thoni diçka.
Përshëndetje e dashur lexuese, më vjen keq për stresin që po përjeton dhe për atë që i ka ndodhur bashkëshortit tënd. Nëse ai është arrestuar dhe po qëndron në burg pa pasur faj, i përket drejtësisë të vendosë se çfarë do të bëhet me të. Unë shpresoj të zgjidhet sa më shpejt dhe me drejtësi kjo çështje.
Ndërkohë, të ftoj që të qetësohesh dhe të kërkosh informacion për gjendjen dhe situatën e bashkëshortit për të kuptuar çfarë do të ndodhë më tej. Kërko mbështetje nga njerëz profesionistë: avokat, psikolog, punonjës të policisë, të cilët duhet të merren me çështjen.
Nga ana tjetër, kërko mbështetje, kjo është edhe më e rëndësishme, nga njerëzit që ke më pranë: familjarë dhe miq, të cilët duhet të të mbështesin në këtë moment të vështirë që ti po përjeton. Fol me ta, kërko ndihmë sa më shumë, sepse nuk duhet ta përballosh e vetme këtë situatë. E kuptoj që është shumë e vështirë për ty të përballosh me qetësi këtë që po të ndodh, prandaj mbështetja te njerëzit më të afërt dhe tek ekspertët e fushës është mëse e nevojshme.
Merr pak kohë edhe për veten, mbështetu tek dashuria që ndjen për bashkëshortin dhe shpreso që problemi do të zgjidhet, nëse të gjithë bashkë punoni për ta gjetur një zgjidhje.
Nëse të gjithë po të thonë “bëhu e fortë”, edhe unë të kërkoj që të bëhesh e fortë, të përpiqesh të ruash ekuilibrin për vete, për fëmijët dhe bashkëshortin, por me ndihmën dhe mbështetjen e njerëzve të tjerë, të cilëve duhet t’u kërkosh të të gjenden pranë në këto momente të vështira.
Uroj një zgjidhje të shpejtë dhe sa më të drejtë për bashkëshortin tënd. Nëse situata përkeqësohet dhe ti nuk mundesh ta përballosh emocionalisht, pavarësisht ndihmës së njerëzve të afërt, mund të kontaktosh për t’u këshilluar nga një psikolog. Të përshëndes!
*Lediona Braho, psikologe klinike
Për Iconstyle.al
