Albano Bogdo ka folur për të shkuarën dhe për një nga betejat më të mëdha në jetën e tij, ai me alkoolin. Në një intervistë për revistën “Klan”, aktori ka pranuar se vite më parë ka qënë i varur nga alkooli, por falë vendosmërisë arriti të hiqte dorë. Albano tregon se prej katër vitesh nuk ka vënë alkool në buzë dhe se nuk është tunduar asnjëherë.
“Kam që në 2 qershor të vitit 2014 që nuk pi më alkool sikur të përmbyset bota. Nuk më pihet më. Edhe kur bëra 30-vjetorin, të gjithë pinë u bënë tapë dhe unë piva vetëm sprite. As për vitin e ri, as për 1 majin, për asnjë festë. Kjo tregon vendosmërinë dhe karakterin. Kam 4 vite që nuk jam tunduar asnjëherë. Kur ulem me njerëz që pinë alkool me shpifet”. – tha aktori Albano Bogdo.
Albano, së bashku me trupën e aktorëve të “Duplex” do të ngjitën në skenë këtë të shtunë. Për Albanon, “Duplex” përkthehet në një sfidë të re të cilën mezi pret t’ia dalë me sukses.
