Kur shijoni një gotë verë në lokalet apo restorantet e kryeqytetit mund të jepni në moment një mendim për cilësinë e saj. Nëse mund të jeni ankuar për shijen e pakëndshme apo cilësinë e dobët, atëherë keni pasur të drejtë.
“Top Channel” denoncoi skandalin me verën që serviret në lokalet e Tiranës, e cila u zbulua se prodhohet brenda 10 minutash në kushte laboratorike, pa rrush dhe shitet 100 lekë për litër.
Vera sintetike shkakton probleme të rrezikshme për ata që e konsumojnë, sipas mjekëve. Dhe ndërsa viktima mbeten klientët e këtyre lokaleve, ndoshta nëse dini ta dalloni mund të ngrini zërin për t’jua ndërruar me një pije tjetër.
Somelieri Dashamir Elezi tregoi për “Top Channel” se, ka dy mënyra si mund ta dallojmë verën false.
E para, nëse shija e verës është e shkurtër dhe humbet menjëherë, atëherë është një produkt i manipuluar.
Mënyra e dytë është nëpërmjet një eksperimenti me një burim drite. “Nëse arrijmë ta perceptojmë burimin e dritës dhe nuk kemi substanca pezull, do të thotë se vera është cilësore”, u shpreh somelieri.
