I gjithë komuniteti i bjondeve bie dakort se të gjesh ngjyrën perfekte bjonde kërkon shumë kohë, shumë para si dhe një investigim shumë të detajuar në lidhje me parukjeren, që e qan këtë punë!
Por për këtë të fundit, çdo bjonde ka rezerva, pasi mjafton dy – tre larje dhe flokëve u ikën e gjithë magjia, e dalëngadalë shndërrohet në një ngjyrë të verdhë, që sa herë më pyesin se ç’ngjyrë i ke flokët, i përgjigjem “hekur i ndryshkur”.
Dhe në këtë histori, parukjerja nuk ka asnjëherë faj, pasi siç menjëherë hidhet në sulm duke u mbrojtur: “Hë më thuaj, sa ke pa i lyer? Bjondja do punë o goc, do të mbahet!”.
Kam shumë e shumë kohë që përpiqem të gjej një zgjidhje! Së shpejti, zhvendosem në një tjetër shtet dhe po vdisja nga dëshira për të mësuar sesi mund të kujdesem vetë për flokët e mi, në ngjyrë “hekur të ndryshkur”.
Tentativa e parë, ishte të blija një bojë profesionale dhe t’i lyeja vetë, pa ndihmën e askujt flokët! Ok, nuk do e zgjas shumë këtë histori pasi ishte një dështim i vërtetë dhe përfundoi me tim atë, i shqetësuar i shkreti, erdhi pranë shumë i kujdesshëm, duke më pyetur nëse isha mirë dhe nëse nuk kam ndonjë sëmundje për t’u shqetësuar!
Mirëpo të dashura bashkëvuajtëse bjonde, pas shumë eksperimentesh, mund të them e bindur se kam gjetur kutinë e Pandorës.
Që në muajin maj, një artikull në www.iconstyle.al prezantonte shampon lejla për të gjitha bjondet, për t’i kthyer shkëlqimin platin dhe për të mbytur të verdhën! Normalisht që nuk e besova fare dhe i bëra “skip”, mirëpo kur pashë se “Marie Claire” apo “Harpers Bazzar”, po bërtisnin të njëjtën zgjidhje, nuk mund ta lija pa provuar.
Menjëherë nisa kërkimin në kryeqytet për shampon e bekuar lejla dhe pas shumë trokitjesh në dyqane, më në fund gjeta atë të duhurën. Por si gjithmonë, unë kërkoja shampon lejla, shitësja e dyqanit më kundërshtonte dhe më përgjigjej: “Moj goc, s’kemi lejla! Kemi bjonde silver!” Pra, kur ta kërkoni, e mësuat tashmë emrin! Mos dilni nga dyqani pa marrë edhe maskën lejla, e cila është e vetmja që arrin të bindë flokët e mi të shpeshtë dhe me karakter luani, të nënshtrohen para krëhërit!
Dhe surpriza është se të dyja, nuk kushtojnë më shumë se 2000 lekë të reja!
Ok, ja ku jemi! Unë me flokët e mi në ngjyrë “hekuri të ndryshkur”dhe shampo lejla!
Edhe përse pashë shumë video sesi aplikohet në Youtube, vendosa të ndjek këshillat e shitëses, e cila më sugjeroi se pasi ta laj kokën normalisht me shampo, të vendos shampon lejla dhe ta mbaj për 10-15 minuta, duke e aplikuar nga rrënja!
Ndërsa herët e tjera, mjafton ta mbash vetëm 5 minuta! I ndava të gjitha flokët në seksione dhe aplikova shampon lejla dhe prita mrekullinë dhe të betohem s’e mendoja kurrë se do të funksiononte.
Shpëlava me ujë flokët dhe pasi i thava me peshqir, aplikova maskën lejla dhe nuk më besohej se flokët e mi kriheshin dhe mbi të gjitha ishin GRI!
I thava menjëherë për të parë rezultatin dhe mund të vihej re ndyshimi!
Përballja e parë ishte me tim vëlla, i cili nuk vë re asnjëherë eksperimentet e mia me flokët, por këtë herë sapo më pa tha: “Paske lyer flokët?”
Dreqi ta hajë, e gjeta më në fund zgjidhjen dhe dua ta ulëras tek çdo bashkëvuajtëse!
Ok, për ta sqaruar! Pigmenti lejla që ka shampo anulon çdo ton të verdhë dhe korrigjon ngjyrën e flokëve tuaj. Por, rrënja mbetet e njëjta nëse është ngjyrë e errët!
Mund ta filloni duke e përdorur një herë në jave e pas disa javësh mund ta përdorni edhe më shpesh. Sa më i fortë pigmenti aq më i madh është efekti, ndaj zgjidhni shmapon e duhur duke u nisur nga ngjyra e flokëve. Nëse flokët i keni në ngjyrën platin, zgjidhni një shampoo me pigment te fortë lejla në blu.
Ju vaftë mbarë!
Burimi: Iconstyle.al
Ndalohet riprodhimi dhe kopjimi pa lejen e redaksisë.
