Mëngjesin e sotëm është shënuar viktima e dytë nga Koronavirusi në Shqipëri.
Bëhet fjalë për 66-vjeçarin nga Lushnja, i cili prej ditësh ishte i shtruar në Spitalin Infektiv.
Ai vuante nga disa sëmundje të tjera shoqëruese dhe pavarësisht ndihmës mjekësore, nuk ka mundur të mbijetojë.
66-vjeçari kishte histori udhëtimi me Italinë dhe aty u infektua me COVID-19.
Ai më 23 shkurt u shtrua në spitalin “Shefqet Ndroqi” dhe infektoi edhe 8 mjeke dhe infermierë.
Ndërkohë, pak ditë më parë burime për “Top Channel” kanë treguar se 66-vjeçari u infektua nga baxhanaku i tij, i cili kishte disa ditë që kishte ardhur nga Italia.
Ky i fundit pas kthimit, ishte vetëkarantinuar, por nuk shfaqi shenja të Covid-19.
Kujtojmë se pak ditë më parë humbi jetën një 73-vjeçare nga Durrësi, e cila vuante nga një sërë sëmundjesh.
Njoftimi i Ministrisë:
Ndërron jetë në spitalin infektiv pacienti 66-vjeçar, kishte komplikacione të rënda.
Mëngjesin e sotëm ndërroi jetë pacienti i shtruar në spitalin Infektiv, i konfirmuar me COVID-19, i cili ishte në gjendje të rëndë, në respirim të drejtuar në reanimacion.
66-vjeçari nga Lushnja prej disa ditësh ishte i shtruar në shërbimin Infektiv, në gjendje të rëndë. Pacienti vuante nga disa sëmundje shoqëruese: insuficenca kardiake, edemë pulmonarë dhe insuficencë renale.
