Edicioni i 23-të i panairit të librit, që organizohet çdo vit në kryeqytet, është anuluar zyrtarisht. Shoqata e Botuesve Shqiptarë ka bërë të ditur se panairi është anuluar si pasojë e masave të marra për parandalimin e përhapjes së mëtejshme të Covid-19. Në deklaratën e Shoqatës thuhet se ata kanë bërë çdo përpjekje për ta organizuar, por kanë marrë një përgjigje negative nga Ministria e Shëndetësisë, sepse panairi përbën rrezikshmëri të lartë për përhapjen e virusit.
Panairi i 23-të i librit pritej të mbahej nga data 12-15 nëntor në Pallatin e Kongreseve. Ndërkohë ditën e djeshme Ministria e Shëndetësisë urdhëroi hapjen e të gjitha kinemave në vend, por duke ndjekur të gjitha rregullat e protokollit anti-Covid. Nga ana tjetër për teatrot dhe koncertet nuk është marrë ende asnjë vendim për rihapjen e tyre.
Deklarata e Shoqatës së Botuesve Shqiptarë
Të dashur kolegë botues, librarë, ekspozues, pjesëmarrës në Panairin e Librit të Tiranës,
ju vëmë në dijeni që, pavarësisht gjithë interesimit tonë dhe përgatitjeve për të bërë të mundur organizimin e Panairit të 23 të Librit, sipas planifikimit më 12-15 nëntor 2020, përgjigja që erdhi sot, dt. 14.10.2020, nga Ministria e Shëndetësisë dhe e Mbrojtjes Sociale, është negative, për shkak të “rrezikshmërisë së lartë në përhapjen e Covid-19 gjatë këtij aktiviteti, në situatën në të cilën ndodhemi”.
Ju falënderojmë të gjithëve për mirëkuptimin dhe mbështetjen dhe ju urojmë punë të mbarë,
Grupi organizator
