Këtë javë do të flasim për një serial të bazuar mbi një histori të vërtetë krimi, “Dirty John”, që eksploron temën e dashurisë, një marrëdhënie mes një çifti që ka një fillim premtues por me premisa për një fund katastrofik.
Debra (Connie Britton), është një grua në mesomoshë, që pavarësisht pamjes së saj të mrekullueshme dhe profesionit të suksesshëm si një dizajnuese në L.A., nuk po gjen dot një mashkull që t’i pëlqejë vërtet deri sa takon John-in.
Fakti që ajo ka qenë e martuar katër herë më parë; dhe ka dy vajza me të cilat nuk ka një marrëdhënie shumë pozitive, e bën atë mosbesuese për të pasur një partner në krahë.
Por takimi me John Meehan ( i famshmi Eric Bana) i duket shumë interesant, një mjek anestezist, i shkujdesur sa i pëkret veshjes, dhe i këndshëm e me humor, e bën të mendojë se ka shpresë për dashuri, deri në momentin kur ai largohet nga shtëpia e saj pasi Debra nuk pranon të flejë me të pas takimit numër 1.
Dhe duhej ta shihte si një sinjal këtë veprim të tij, por jo! Pas një telefonate për një takim të dytë, ku John as nuk i kërkon falje për zënkën e parë, Debra vendos që të dalë sërish me të dhe këtë herë, John fiton shumë pikë!
Marrëdhënia e tyre nis të konsolidohet shumë shpejt, pavarësisht se John nuk gëzon aspak respektin e dy vajzave të Debra-s. Por ai nuk e vret mendjen që të rregullojë marrëdhënien me to, nis të kujdeset për partneren e tij dhe madje brenda 8 javësh ata martohen në fshehtësi dhe blejnë një shtëpi për të jetuar bashkë.
Kush është John Meehan?
John është një mashkull i pashëm dhe inteligjent, por është një gënjeshtar patologjik. Ai është sadist, dhe i pëlqejnë t’i bëjë “pretë e tij” gratë në nevojë. Ka kaq shumë gjëra që thjesht nuk tregojnë një sjellje normale të tij si dyshimet e vajzave të saj, këmbënguljen e tij për të instaluar kamera në shtëpi dhe për të hapur një kasafortë për të mbajtur gjërat e vlefshme të tyre, si dhe zemërimi i tij kur ajo refuzon të flejë me të pas takimit të tyre të parë….
Shikuesi mezi pret që Debra të kuptojë se diçka nuk shkon mes tyre, por e vërteta e trishtuar është se dashuria është një forcë aq e fuqishme sa është e vështirë të dallohet kur bëhet vdekjeprurëse.
Dhe vetëm në pjesën e dytë të sezonit, Debra do të shohë fytyrën e vërtetë të John, i cili nuk është dashuruar fare me të, por e përdor si prenë e tij, hakon telefonin e saj dhe i merr të dhënat e saj bankare. Ai nuk u vonua te mbrëmja gala e Debra-s sepse po punonte, në fakt pyetja është: A është me të vërtet një mjek anestezist?
Historia e vërtetë, akoma më e frikshme!
Sado e frikshme t’ju duket seriali thriller “Dirty John”, nuk është asgjë në krahasim me historinë e jetës reale që frymëzoi serialin. Kur Debra Newell u takua me John Meehan për darkë në një restorant me qirinj në Kaliforni në tetor 2014 pas një sërë takimesh të para jo-shpresuese, diçka ndjihej ndryshe. Ai ishte i bukur, karizmatik, i realizuar dhe dukej vërtet i interesuar për të. Pas katër martesave të dështuara, ajo ndjeu se ndoshta kishte gjetur “të duhurin”.
Por gjatë javëve dhe muajve të ardhshëm, Meehan ngadalë e zbuloi veten dhe doli të jetë e kundërta e asaj që ajo njihte: Një gënjeshtar patologjik me një temperament të shëmtuar, një e kaluar kriminale dhe një histori të gjatë të lidhjeve, manipulimit dhe abuzimit të grave.
Reporteri Christopher Goffard publikoi kronikat e vërteta ku u bazua seriali, për të reguar se si mashkull i ëndrrave të Debra-s u bë një makth për të dhe familjen e saj. Një lidhje dashurie që nisi në parajsë, por zbriti me këmbë në tokë dhe u përplas me forcë!
/Iconstyle.al
