Në 9 mars vendi ynë do zgjohej me dy të prekur nga Covid-19, që solli reagimin e menjëhershëm të qeverisë e cila mori masa dhe vendosi vendin në izolim total.
Aso kohe, numri i viktimave dhe rasteve të reja ishte i ulët në krahasim me vendet e tjera dhe sipas qeverisë kjo ndodhi falë masave të marra.
Nga ana tjetër ekspertët kërkonin të duronim edhe pak në karantinë, duke u zotuar se me fillimin e qershorit, situata do përmirësohej dhe do i riktheheshim normalitetit.
Ndërkohë në 18 maj qeveria lehtësoi masat dhe të gjithë iu rikthyen pak a shumë jetës së mëparshme, sigurisht duke pretenduar se po bashkëjetojmë me koronavirusin, i cili tashmë ka ulur virulencën e tij.
Fatkeqësisht e kundërta ndodhi.
Rastet e reja po shtohen çdo ditë e më shumë, teksa qeveria ka bërë me dije se këtë herë nuk do marrë masa dhe kufizime, dhe se izolimi është në planet e largëta.
Padyshim ky vendim ngre pikëpyetje të mëdha, se përse qeveria na mbajti mbyllur për gati 3 muaj, kur situata duket të ishte brenda kontrollit dhe tashmë që po përballemi me një panoramë të frikshme nuk po merr asnjë masë.
Këtë shqetësim e ka adresuar së fundmi, edhe Presidenti i Konferencës Ipeshkvnore të Shqipërisë dhe Kryetar i Këshillit Ndërfetar të Shqipërisë, Mons. George Frendo, i cili me anë të një statusi në Facebook i ka bërë apel shtetit për masa më të forta për situatën e krijuar në vend nga koronavirusi.
Me të drejtë, ai shprehet se kur numri i të infektuarve ishte shumë më i vogël, u dhanë shumë urdhra për të shmangur rreziqet, ndërsa tani kemi frikë se më shumë kufizime do të krijojnë probleme për ekonominë e vendit.
Ai pyet se çfarë duhet të ketë përparësi, ekonomia, apo shëndeti i popullit dhe citon eprorin gjeneral të jezuitëve se koronavirusi është një kërcënim jo vetëm për jetën njerëzore dhe për punët, por edhe për demokracinë.
Pavarësisht se të gjithë kaluam një periudhë të keqe gjatë izolimit dhe ekonomia është e dërrmuar, vlen të theksohet se në situata të tilla qeveria duhet të jetë më e kujdeshme dhe t’i bëjë mirë llogaritë, duke vendosur në peshore edhe shëndetin e qytetarëve, edhe ekonominë dhe duke hequr politikat që i interesojnë.
Padyshim, ajo që pretendojmë nuk është rikthimi i karantinës, por marrja e disa masave të nevojshme në raste të tilla, kur epidemia po bëhet gjithnjë e më e egër.
MESAZHI I PLOTË
JU LUTEM: MË SHUMË KUJDES PËR SHËNDETIN E POPULLIT!Mons. George Frendo O.P.
Këtë thirrje e bëj i nxitur nga dashuria për popullin tonë dhe nga interesi për të mirën e përbashkët.
A nuk na shqetëson situata e tmerrshme e përhapjes së koronavirusit në vendin tonë? Ka shumë ditë, që dëgjojmë për një numër të infektuarish gati çdo ditë më të lartë sesa ditën e mëparshme. Çdo ditë infektohen mbi njëqind veta. Kur numri i të infektuarve ishte shumë më i vogël, u dhanë shumë urdhra për të shmangur rreziqet: asnjë makinë në fundjavë, shumë kufizime rreth daljes, autobusët nuk përdoreshin, një ditë madje dolën edhe kamionët ushtarake!!! Vërtetë, situata përshkruhej si një luftë!Po tani? A jemi pajtuar me koronavirusin? Ose kemi frikë se më shumë kufizime do të krijojnë probleme për ekonominë e vendit? E çfarë duhet të ketë përparësi, ekonomia, apo shëndeti i popullit? Ministrja e shëndetësisë ka bërë shumë mirë, që shpesh herë ka apeluar për ruajtjen e masave për t’u mbrojtur kundër epidemisë. Por nuk mjafton fjala e Ministres.
Para disa ditëve, Atë Arturo Sosa, eprori gjeneral i Jezuitëve, tha se koronavirusi është një kërcënim jo vetëm për jetën njerëzore dhe për punët, por edhe për demokracinë. “Demokracia mund të jetë një nga viktimat e pandemisë nëse nuk bëjmë kujdes për situatën tonë politike”.
Ndoshta dikush mund të më akuzojë se po ndërhyj në politikë? Jezusi ka afruar dhe shëruar shumë të sëmurë. Fatkeqësisht unë nuk e kam këtë aftësi! Por e kam për detyrë të flas për mbrojtjen e shëndetit të popullit tonë.
Ju lutem: më shumë kujdes për shëndetin e popullit tonë!
