E di ku do të doja të isha tani? Në plazh! Jo vetëm kaq, jo në një plazh çfarëdo, me një ambient të zakonshëm dhe njerëz të rastësishëm përreth. Unë e di saktësisht ku dua të jem dhe me kë dua të jem.
Të gjithë kemi parë pak ditë më parë fotot me plazh të fashionistave dhe influencueseve më në zë në Shqipëri.
E gjitha nisi nga fotot e shishes së mbushur me rërë, brenda së cilës ishte ftesa e pushimeve që do të dëshironim të gjithë: pushime në jaht.
Ftesa i ishte dërguar disa prej emrave të lidhur me modën për një udhëtim dy ditor, për të eksploruar bukurinë e plazheve të Shqipërisë me jaht. E kuptuam se po “kurdisej” diçka kur blogeret Odeta Banushaj apo Estela Ujka publikuan videot e ftesave në “Instastory”. Më pas ato na servirën çdo detaj, përgatitjet, valixhen dhe rrugën drejt destinacionit.
Ideja e eventit ishte të mblidheshin disa nga influencueset e modës, qëllimi ishte të kënaqeshin. Jonida Maliqi, Irena Kita, Estela Ujka, Odeta Banushaj, Erisa Kacupi, Niko Komani, Sarah Berisha dhe të tjerë miq u mblodhën bashkë në një jaht si kurrë më parë. Mund ta quajmë si të parin event ku influencuesit qëndronin kaq gjatë me njëri-tjetrin, duke shijuar bisedat për modën, ushqimin apo muzikën së bashku.
Ajo që dalluam nga fotot e publikuara gjatë eventit të modës ishin veshjet dhe aksesorët. Duhet të keni të paktën një palë rroba banjo trup kur shkoni me pushime dhe byzylykët apo varëset nuk duhet t’i hiqni në plazh.
Ndërsa u nisën nga Saranda drejt Porto Palermos, Gjirit të Kakomesë deri në Jalë, Odeta tregon eksperiencën e saj dhe fjalia që thekson është: “Jemi super kënaqur”.
“Ishte i pari event që qëndronim kaq shumë me njëra-tjetrën dhe nuk kishte vetëm trokitje gotash e foto”, thotë blogerja për “Iconstyle.al”.
Për idenë e pushimeve me jaht, Odeta është në një mendje me të gjithë ne:
“Të jep mundësinë të bësh plazhin ku dëshiron, të shkosh në vende të cilat mund t’i arrish vetëm përmes udhëtimeve në det. Ke mundësinë të shijosh peizazhe fantastike që të ofron riviera jonë dhe nuk është luks, pasi është një shifër e përballueshme nëse je grup”.
Të shoqëruar nga tre fotografë dhe kameramanë, fashionistat shqiptare patën mundësinë të na përcillnin eksperiencën e tyre. Si event i parë i tillë, hapi një kapitull të ri për botën e influencuesve të modës në Shqipëri. Ndikimi që kanë te ndjekësit duket se po vlerësohet, ashtu siç ndodh me kolegët e tyre jashtë kufijve shqiptarë.
Burimi: Iconstyle.al
