E dimë që ka kaluar vetëm një muaj nga viti 2020, por mund të themi se që tani, një serial është kurorëzuar si më i miri i të mirëve!
E kemi fjalën për “The Witcher”, një serial fantazi i publikuar në dhjetor nga Netflix (e gjeni online kudo në faqet pirate), të cilin edhe pse nuk e keni parë, praktikisht do t’ju duket i njohur nga imazhi i personazhit kryesor Geralt of Rivia.
Bjondi tërheqës me muskuj, ish-supermeni Henry Cavill ka pushtuar rrjetet sociale me karakterin e tij tërheqës dhe është një nga arsyet kryesore se përse “The Witcher” po pëlqehet kaq shumë.
Seriali është i bazuar në 8 novelat fantazi të shkrimtarit polak Andrzej Sapkowski, botuar në vitet 1990. Librat u përshtatën në një film fantazi në gjuhën polake në vitin 2001, më pas në një seri televizive polake në 2002-shin dhe në një video-lojë shumë të suksesshme në vitin 2007.
Por filmi dhe seritë televizive u konsideruan si përshtatjet më të varfra të romaneve të Sapkowski-t, duke marrë disa vlerësime mjaft të tmerrshme.
Përshtatja në gjuhën angleze e Netflix, e krijuar nga Lauren Schmidt Hissrich ndjek të njëjtën histori si seriali dhe adaptimet e mëparshme.
Kush është The Witcher
Geralt of Rivia është një gjuetar përbindëshash, i urryer nga shoqëria pasi njihet si një njeri mutant, që bën magji. Por ndonëse asnjë nuk e do, të gjithë e kërkojnë për të bërë atë që ai bën më mirë, të vrasë përbindësha.
Geralt është i destinuar të mbrojë Ciri-n, një princeshë që mbijetoi pasi mbretëria e saj Cintra u rrëzua. I betuar që kur ajo ishte një embrion në barkun e nënës, Geralt do të mbajë premtimin për t’i ardhur Ciri-t në ndihmë kur ajo zhduket papritur!
Gjatë rrugës, ose para se të takojë Ciri-n (kohët do t’ju bëjnë pak lëmsh) ai gjen shpirtin e tij binjak, një magjistare të quajtur Yennefer of Vengerberg.
Per ju që i adhuroni personazhet e forta, heronjtë që luftojnë për të drejtën dhe meshkujt e bukur si Henry, e themi me siguri se do ta adhuroni!
Nëse doni një arsye tani në këtë moment, ja ku e keni:
“The Witcher” flet vërtet për aventurat e Geralt of Rivia, po një nga kënaqësitë më të mëdha të serialit janë femrat në role kryesore, që plotësojnë treshen fantastike, magjistraja Yennefer (Anya Chalotra) dhe princesha Ciri (Freya Allen).
Historia e Yennefer, fillon me babanë e saj birësues që ia shet vajzën një magjistareje me vlerë më pak se çmimi i një derri – për shkak të aftësive të saj të kufizuara, kurrizit të dalë dhe pengesës në të folur.
Por ajo dëshmon se ka aftësi të jashtëzakonshme magjike, kur mësuesja e saj Tissaia e trajnon sesi të përdorë fuqitë.
I pari që dëshmon fuqitë e saj është Istredd, i cili nis një marrëdhënie pasionante me magjistaren e re dhe interesante për t’u parë pasi shpesh personat me aftësi të kufizuara nuk shikohen si qenie seksuale me dëshira romantike.
Por Yennefer nuk është aspak e kënaqur me pamjen e saj dhe për ta ndryshuar atë, i duhet të sakrifikojë shumë, mitrën e saj dhe dëshirën për t’u bërë nënë një ditë.
Kur këto të dyja i merren përgjithmonë, Yen shndërrohet në magjistaren më tërheqëse të cilën ajo e ka ëndërruar gjithmonë. Në botën e magjistareve femra, feminiliteti dhe seksualiteti idealizohet. Ato kanë qëllim të përdorin bukurinë e tyre dhe aftësitë për të këshilluar monarkët. Por kur papritur zbulohet se Yen ka gjak elfi (nga babai), atëherë gjërat nuk shkojnë siç duhet!
https://www.instagram.com/p/B5ssXNOA7PU/
Pse koha do t’ju bëjë konfuzë!
Historia zhvillohet përmes tetë episodeve. Gjatë serialit kemi një ndërthurje të kohëve për të treguar përrallat e veçanta të personazheve kryesore që janë Geralt, Yen dhe Cirilla. Pra, kohështrirja nuk është lineare, ngjarjet tregohen në kohë të ndryshme dhe të ngatërrojnë pasi episodi i parë flet për të tashmen, ndërsa episodet e tjera flasin për të kaluarën, por shikuesit i duket sikur historia ndodh në të njëjtën kohë.
Problemi është se kjo mund të jetë super konfuze, ndaj Netflix krijoi një tregues kohor vërtet të dobishëm, i cili duhet të ndihmojë çdo shikues që humb në rrjedhën e kohës.
Historia zhvillohet në tokën imagjinare të Kontinentit, një tokë e madhe që përbëhet nga disa mbretëri të njohura, Nilfgaard, Cintra dhe Temeria dhe një vend misterioz i quajtur Kaer Morhen.
A quick crash course in the multiple timelines of The Witcher. #TheWitcher pic.twitter.com/qdBVq7ih7R
— NX (@NXOnNetflix) January 7, 2020
Për ty që je fans i Game of Thrones
Një faktor mjaft i madh që ndikoi në popullaritetin e ketij seriali është se disa fansa të zhanrit të fantazisë po kërkonin një film për të zëvendësuar Game of Thrones (për mua nuk e zëvendësoi as 50 %).
Game of Thrones i HBO-së vërtetoi se ekziston një audiencë që vdes për tematika fantazie mesjetare, dhe me përfundimin e tij në 2019-n, Netflix solli një serial fantazi që i ka të gjitha, një betejë epike, peizazhe fantastike, elfë dhe sigurisht, dragonj.
