Është arrestuar ditën e djeshme në ambientet e Spitalit të Traumës mjeku reanimator, Fitim Marku, në kuadër të operacionit policor të koduar “Skaneri.”
Menjëherë u publikuan edhe videot e arrestimit të mjekut të njohur ku ai shihet teksa del nga ambientet e spitalit me pranga në duar, shoqëruar nga efektivët që e fusin në furgonin e policisë. Momenti i arrestimit është shpërndarë kudo në media, ndërsa mësohet se ka qenë një agjent i policisë së Tiranës i cili u paraqit si pacient dhe i dha 20 mijë lekë mjekut të arrestuar, e më pas ndërhyri për arrestimin e tij.
Dhe sigurisht policia u sigurua që të bënte “zhurmë” me arrestimin e mjekut anestezist. Kjo pasi ky i fundit u shoqërua nga efektivët me kapuçë që ecnin gjithë krenari si të kishin kapur kriminelin më të kërkuar në vend.
Futja në kurth e mjekut nga një agjent i infiltruar nxiti jo pak reagime edhe nga gazetarë dhe mjekë të tjerë.
Show mediatik u komentua nga profesori dhe mjeku Gëzim Xhepa. Ai shprehet se terrori i qeverisë dha shfaqjen e radhës me skenar të plotë mediatik, duke nxjerrë me pranga mjekun nën shoqërimin e kapuçonëve të zinj, që s’guxojnë t’i afrohen krimit të rrugës, por duke përdhosur uniformën vihen në shërbim të teatrove të Rilindjes.
Nga ana tjetër nisur nga fakti se mjeku “u kap” nga një agjent i infilturar, nuk mund të lihet pa përmendur edhe ky fakt.
Arrestimi me metoda terroristo-komuniste është i neveritshëm, shkruan gazetari Ermal Mulosmani. Ai kërkon që agjentët të infiltrohen nëpër bandat që po terrorizojnë vendin me vrasje, rrëmbime, zhdukje dhe jo në spitale.
Probleme të tilla janë hasur shpesh në Shqipëri dhe jo vetëm në profesionin e mjekut, por edhe policëve e mësuesve. Këto profesione korruptohen lehtë pasi nuk paguhen aq sa duhet, pa pëmendur këtu kushtet skandaloze të punës dhe oraret e zgjatura. Duket se këto profesione janë dorëzuar para qeverisë, duke iu nënshtruar dhe pranuar rrogën e ulët që iu caktohet. Kështu ata detyrohen të nxjerrin paratë nga pacientët, në rastin e doktorëve, apo studentët, në rastin e mësuesve. Sigurisht policët nuk mbeten pas…
Por problemi i këtyre profesioneve fillon që me nisjen e një pune të tillë. Të jesh doktor, mësues apo polic në Shqipëri të duhet një nga këto të dyja: para ose dikush i pushtetshëm. Pra siç shpesh është raportuar, njerëzit e paguajnë qeverinë dhe institucionet për një vend pune në një profesion të tillë. Kështu ata jo vetëm që nuk fitojnë sa duhet, dhe sa kolegët e tyre jashtë vendit, por ata duhet të shpenzojnë një shumë të konsiderueshme parash për të siguruar fillimisht një vend të tillë pune.
Ashtu si në rastin e mjekut që u arrestua dje, ankesat nuk kanë munguar as në rastet e tjera për mësuesit apo policët. Por a mund të ketë një zgjidhje për të gjithë këtë? Nëse mjekët, mësuesit dhe policët do të paguheshin aq sa meritojnë dhe aq sa duhet, episode të tilla nuk do të ndodhnin. Ndaj, ashtu ai pedagogët së fundmi, edhe mjekët, mësuesit dhe policët duhet të kërkojnë të drejtat e tyre përballë qeverisë, duke protestuar dhe duke mos pranuar kushtet e tyre, për të mos u detyruar të shkelin me këmbë krenarinë dhe ndërgjegjen e tyre duke marrë para.
