Pas dy javësh karantinim, kryeministri i Kosovës, Avdullah Hoti, e ka fituar betejën me COVID-19.
KosovaPress shkruan sot se kryeministri Hoti ka dalë negativ në testin e fundit për virusin dhe tashmë është rikthyer në punë.
“Kryeministri Hoti është shëruar dhe është kthyer sot në punë”, thonë burime nga qeveria.
Hoti njoftoi se ishte infektuar me COVID-19 më 2 gusht. Ai tregoi se nuk kishte pasoja të rënda nga virusi dhe se po e kalonte lehtë në shtëpinë e tij.
Ndërkohë, Kosova ka shënuar një tjetër humbje në orët e fundit, ku një mjek nefrolog nga komuna e Vitisë, Feti Hetemi, i infektuar me COVID-19, ka ndërruar jetë në orët e para të mëngjesit të sotëm.
Lajmin e kanë bërë të ditur familjarët e tij nëpërmjet një postimi në profilin e tij në rrjetin social Facebook.
“Të nderuar familjarë, shokë dhe miq, me pikëllim të thellë ju njoftojmë se sot në orët e para të mëngjesit ka ndërruar jetë më i dashuri i ynë Dr.Feti Hetemi. Doki, edhe pse u sfidua në jetë nga shumë stuhi të natyrave të ndryshme dhe i përballoi ato kryelartë, sot ka humbur betejën me sëmundjen Covid-19. Ndjehemi të trishtuar nga kjo humbje, por më shumë se krenar që e patëm. Lamtumirë Dok, burrë fisnik që me shumë mund dhe sakrificë arrite në piedestalet e humanitetit dhe çështjes kombëtare, duke mos pushuar për asnjë moment me shpirtin tënd luftarak për të mposhtur padrejtësitë. Varrimi do të bëhet sot në ora 16:00 në varrezat e qytetit të Vitisë, duke i respektuar masat e IKSHPK-së”, ka shkruar Fatos Hetemi.
/Lajmi.net
