Është rritur me 14 numri i të prekurve ditorë me koronavirus në Shqipëri, duke e çuar numrin total të të prekurve në 750. Harta e të infektuarve me COVID-19 zgjerohet në Tiranë, Krujë dhe në Shkodër.
Gjatë 24 orëve të fundit, 9 pacientë të tjerë i janë shtuar listës së të shëruarve, duke e çuar totalin e të shëruarve nga COVID-19 në 431.
Mëngjesin e djeshëm ka ndërruar jetë një 52-vjeçar nga Kruja me iniciale S. B i cili ka qëndruar për 8 ditë në reanimacion i intubuar në spitalin infektiv. Në mbrëmje ka ndërruar jetë një tjetër pacient, me iniciale R.K. i shtruar në spitalin “Shefqet Ndroqi”.
Ai ishte punonjës i Doganës Shqiptare dhe prej 2 javësh ndodhej në gjendje të rënduar shëndetësore. Deri më tani, shkon në 31 numri i qytetarëve që e kanë humbur betejën me këtë sëmundje, megjithë përpjekjet e stafit mjekësor.
Në dy spitalet COVID aktualisht po marrin shërbim 31 pacientë.
31 të shëruar nga koronavirusi në Kosovë
Ministri i Shëndetësisë në Kosovë, Arben Vitia ka bërë të ditur se gjatë të martës, 31 persona janë shëruar nga Koronavirusi, kurse 10 persona kanë rezultuar pozitiv në testin për COVID-19.
Vitia bëri të ditur se këto 10 raste kanë rezultuar pozitive në mesin e 250 mosrave të testuara gjithsej.
Deri më tani numri i përgjithshëm i të infektuarve ka arritur në 790 në nivel vendi, ndërsa gjithsej 22 raste kanë ndërruar jetë pasi kanë pasur sëmundje të tjera shoqëruese.
Mbi 3 mln të infektuar në mbarë botën
Numri i njerëzve në të gjithë botën të konfirmuar me koronavirus është rritur në më shumë se tre milionë, dhe të paktën 217,000 kanë vdekur, sipas të dhënave të përpiluara nga Universiteti Johns Hopkins. Gati 929,000 njerëz janë shëruar.
Franca ka zbuluar planet, përfshirë miratimin e testimit agresiv, për një lehtësim gradual të bllokimit të saj mbarëkombëtar nga 11 maji.
Gjermania tanimë ka lehtësuar disa prej kufizimeve të saj, por njerëzit tani inkurajohen të qëndrojnë në shtëpi mes shqetësimit se shkalla e infeksionit mund të rritet përsëri.
Në Gjermani gjatë 24 orëve të fundit janë shënuar 202 të vdekur nga koronavirusi. Numri total i rasteve ka shkuar mbi 157 mijë, ndërsa në total ka 6 mijë e 115 të vdekur nga koronavirusi.
Brazili raportoi numrin më të madh të vdekjeve në një ditë të vetme ndërsa shpërthimi atje po përshkallëzohet me një stuhi politike rreth kritikave ndaj Presidentit Jair Bolsonaro. Ministria në Brazil raportoi një rekord prej 474 njerëzish që vdiqën nga COVID-19 në 24 orët e fundit, duke e çuar numrin e vdekjeve të vendit në 5,017.
Hotelet në Poloni do të jenë të hapura për pushimet verore, që nisin tradicionalisht gjatë korrikut dhe gushtit në vend, tha zëdhënësi i qeverisë Piotr Muller, ndërsa shtoi se infeksionet e koronavirusit të ri ishin akoma në rritje në vend.
Të mërkurën, qeveria polake njoftoi vendimin e saj në lidhje me rihapjen e disa bizneseve që ishin mbyllur deri më tani për shkak të pandemisë. Qeveria ka zgjatur mbylljen e shkollave deri në 24 maj.
Katër ishuj spanjollë do të jenë të parët që do të lehtësojnë masat duken nisur nga 4 maji, ndërsa në pjesën tjetër të Spanjës fillojnë lehtësimet pas një jave.
Deri më tani, koronavirusi ka vrarë pothuajse 24 mijë persona në Spanjë. Kujtojmë që Spanja është një nga vendet me masat më të rrepta, duke qëndruar në izolim total për 6 javë.
Parlamenti i Kinës do të fillojë seancën e tij kryesore vjetore në Pekin në 22 maj, më shumë se dy muaj pasi ishte planifikuar fillimisht, për shkak të shpërthimit të koronavirusit.
Organi i lartë politik këshillimor politik i Kinës, Konferenca Konsultative Politike e Popullit Kinez, gjithashtu ka propozuar të fillojë seancën e saj vjetore në 21 maj.
Komisioni Kombëtar i Shëndetit në Kinë thotë se kontinenti kishte 22 raste të reja me koronavirus për 28 prillin, të gjitha, përveç njërit, të ardhur nga jashtë.
Numri i përgjithshëm i vdekjeve mbetet i pandryshuar në 4,633.
/Iconstyle.al
