Sipas një njoftimi nga Ministria e Shëndetësisë, në vendin tonë janë regjistruar 14 raste të reja të infektuara me Covid-19.
Kështu, numri total i të prekurve ka shkuar në 726.
Kruja është kthyer në vatrën më të nxehtë në vend dhe nga 14 raste, 9 ishin në këtë qytet.
Numri i viktimave ka shkuar në 28, pasi për fat të keq mëngjesin e djeshëm ndërroi jetë një 60-vjeçar nga Tirana.
Gjithashtu, brenda 24 orëve të fundit janë shëruar 7 pacientë, ndërsa numri total i të shëruarve ka shkuar në 410.
Ditën e sotme në zonën jeshile ka nisur lehtësimi i masave dhe në disa qytete të vendit do të ketë më tepër lirshmëri në lëvizje.
Gjithashtu kemi dhe një sërë biznesesh që do të hapen, përfshirë edhe dyqanet e rrobave.
Rikujtojmë se vendet e përfshira në zonën e gjelbër janë:
• Qarku Dibër
• Qarku Gjirokastër
• Zona e Përbashkët e bashkive Pogradec, Prrenjas, Librazhd
• Zona e Përbashkët e bashkive Sarandë, Himarë, Konispol, Finiq
• Bashkia Divjakë
Kosova vazhdon të ketë numër të lartë të të infektuarve. Në 24 orët e fundit u regjistruan 32 raste të reja dhe vetëm 1 person i shëruar.
Numri total i të infektuarve ka kaluar vendin tonë duke shkuar në 763 persona.
Numri i viktimave në Kosovë është 21!
Në 24 orët e fundit kemi pasur përmirësim të dukshëm të situatës në 3 shtete europiane.
Italia, Spanja dhe Franca patë një ulje të ndjeshme të viktimave dhe rasteve të reja, gjë që na jep shpresë se së shpejti do të kemi mundësi të kthehemi në normalitet.
Në Itali është shënuar numri më i ulët i viktimave pas më shumë se një muaji.
Në 24 orët e fundit raportohet se numri i viktimave është përgjysmuar krahasuar me një ditë më parë dhe së fundmi 260 persona kanë humbur betejën me COVID-19.
Në vend ka nisur edhe lehtësimi i masave për qytetarët dhe bizneset.
Franca në 24 orët e fundit shënoi 242 viktima, një shifër e ulër krahasuar me pak ditë më parë ku në vend u arrit piku i pandemisë.
Pas vdekjeve të 24 orëve të fundit, në Francë deri tani regjistrohen 22 856 të vdekur nga COVID-19.
Po ashtu, në shtetin francez, deri tani janë regjistruar si të infektuar me koronavirus 162 100 persona.
Ashtu si Franca dhe Itali, edhe Spanja pati një përmirësim të dukshëm.
Ndonëse numri i viktimave ka shkuar në 23 190, qeveria mendon se rreziku më i lartë ka kaluar.
Në Kinë në 24 orët e fundit është shënuar vetëm 1 viktimë dhe 3 raste të reja. Vendi është drejt përmirësimit dhe pritet që së shpejti t’i kthehet normalitetit.
