Ministria e Shëndetësisë ka bërë të ditur se janë konfirmuar 29 raste të reja me koronavirus në 24 orët e fundit në vendin tonë, duke e çuar në total numrin e të prekurve në 663 persona.
Nga rastet e reja, 20 janë në Tiranë ku 13 janë në një burg. 7 persona kanë rezultuar pozitivë në Krujë dhe 2 në Shkodër.
Gjatë 24 orëve të fundit, 29 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 385.
Rezulton se deri tani Berati, Lezha, Mirdita, Rrogozhina dhe Tropoja janë zona ku të gjithë të prekurit deri tani, janë të shëruar.
Aktualisht në vendin tonë janë 251 persona të infektuar aktivë dhe siç shihet numri i të shëruarve është më i lartë. Kjo tendencë tashmë vazhdon të jetë e qëndrueshme.
669 të infektuar në Kosovë
Janë konfirmuar 39 raste të reja pozitive me Koronavirus në Kosovë, duke çuar kështu në 669 numrin e personave të infektuar.
Instituti Kombëtar i Shëndetësisë Publike në Kosovë, bëri me dije dje se janë shëruar edhe 21 persona. Dje ka ndërruar jetë edhe një person si pasojë e COVID-19, duke e çuar numrin total të viktimave në 19.
“Nga data 08 shkurt deri më 23 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 5.627 mostra të dyshimta në virusin SARS-CoV-2 dhe prej tyre pozitive rezultojnë gjithsej gjashtëqind e gjashtëdhjetë e nëntë (669) raste, ndërsa gjithsej nëntëmbëdhjetë (19) raste kanë ndërruar jetë dhe të cilët kanë pasur sëmundje të tjera shoqëruese”, thuhet në njoftim.
Ndërkohë, numri i përgjithshëm i të shëruarve deri më sot është gjithsej 159 raste.
2,7 mln të infektuar në mbarë botën
Më shumë se 190,000 njerëz kanë vdekur për shkak të pandemisë, përfshirë 50,000 në SHBA., me 2.7 milionë të infektuar globalisht, nga të cilët gati 750,000 janë shëruar.
26 milionë njerëz të papunë kanë kërkuar ndihmë në SHBA në pesë javët e fundit që nga shpërthimi i koronavirusit.
Rreth një në gjashtë punëtorë amerikanë kanë humbur vendet e tyre të punës, deri më tani gjëndja më e keqe ekonomike që nga Depresioni i Madh i viteve 1930. Dhoma e Përfaqësuesve të SHBA.-së ka kaluar një paketë ekonomike gati 500 miliardë dollarëshe për të ndihmuar bizneset dhe spitalet.
Itali, bie numri i rasteve të reja
dekjet nga epidemia e COVID-19 në Itali kanë arritur në 464 në 24 orët e fundit, nga 437 që u shënuan një ditë më parë, tha Agjencia e Mbrojtjes Civile.
Lajmi i mirë është se raporti ditor i infeksioneve të reja ra në 2,646 nga 3,370 të mërkurën. Sa u përket të shëruarve është shënuar një rekord i ri me 3033 persona.
Numri i përgjithshëm i vdekjeve zyrtare që nga shpërthimi ka arritur 25.549 në Itali, vendi i dytë me më shumë viktima në botë pas Shteteve të Bashkuara.
Nis testimi i vaksinës në Britani
Testimi i një vaksine eksperimentale COVID-19 filloi tek vullnetarët e shëndetshëm në Universitetin e Oksfordit në Britani, në kërkim të mbrojtjes kundër koronavirusit.
Ndërkohë sipas raportimeve të fundit, kryeministri i Mbretërisë së Bashkuar, Boris Johnson është në gjendje të mirë, pas infektimit me koronavirus.
“Jam i sigurt që ai do të kthehet menjëherë pasi mjekët e tij ta rekomandojnë atë”, tha ministri i Shëndetësisë sipas Sky News.
“Ky vendim i takon kryeministrit pasi të konsultohet me mjekët e tij. Unë i fola dje, ai është në formë shumë të mirë dhe është duke u rikuperuar”.
Kina raporton raste të reja
Kina ka raportuar gjashtë raste të reja me koronavirus që nga fundi i 23 prillit, nga 10 të raportuar një ditë më parë, duke e çuar numrin e përgjithshëm të infeksioneve COVID-19 në 82,804.
Komisioni Kombëtar i Shëndetit në Kinë tha në një deklaratë të premten se dy nga rastet e reja përfshinin udhëtarët nga jashtë. Kishte gjashtë raste të tilla të importuara të raportuara një ditë më parë.
Numri i pacientëve të rinj asimptomatikë, ata të infektuar me virus por që nuk shfaqin simptoma, u rrit në 34 nga 27 raportuar një ditë më parë.
Bullgaria mbyll kufirin me Turqinë
Bullgaria ka mbyllur kufirin e saj me Turqinë për të parandaluar që turqit-bullgarë të hyjnë në vend gjatë ditëve të para të muajit të shenjtë mysliman të Ramazanit.
Urdhri i Ministrisë së Shëndetësisë vlen nga mesnata e 23 prillit deri më 27 prill, në përpjekje për të parandaluar udhëtimin, për shkak të pandemisë së koronavirusit.
Ramazani ka filluar më 24 prill.
Më shumë se 300,000 qytetarë bullgarë jetojnë në Turqi. Mbyllja e kufirit erdhi si përgjigje e informacionit që shumë turq bullgarë në Turqi kishin planifikuar të vizitonin të afërmit në Bullgari.
/Iconstyle.al
