25 raste të reja kanë rezultuar pozitive me koronavirus në 24 orët e fundit në vendin tonë, ndërsa numri i përgjithshëm i të infektuarve ka shkuar në 634.
Numri i viktimave në vendin tonë ka shkuar në 27, pasi ditën e djeshme ndërroi jetë një 71-vjeçar, i cili kishte sëmundje të tjera shoqëruese.
Lajmi i mirë është se Berati, Lezha, Mirdita, Rrogozhina dhe Tropoja janë zona ku të gjithë të prekurit deri tani, janë aktualisht të shëruar.
Në 24 orët e fundit kemi 11 të shëruar, mes tyre edhe një infermier
Kosova ditën e djeshme regjistroi 26 raste të reja me koronavirus dhe 10 të shëruar.
Numri total i të infektuarve na shkuar në 630 ndërsa 138 pacientë kanë fituar betejën me COVID-19.
Në ditët e fundit numri i të infektuarve në Kosovë ka pësuar rënie.
Qytetarët e Maqedonisë së Veriut janë të detyruar të mbajnë maska mbrojtëse për të parandaluar përhapjen e koronavirusit, ka vendosur qeveria maqedonase. Sipas një dekreti të Qeverisë së Maqedonisë Veriore, pajisjet mbrojtëse në fytyrë duhet të vishen në të gjitha hapësirat publike të mbyllura, ku ka më shumë njerëz, siç janë tregjet, dyqanet, bankat, zyrat postare, institucionet shtetërore dhe shëndetësore, transporti publik.
Në hapësirën e hapur, maska duhet të vendosen në tregje dhe vende ku nuk ka mundësi të mbahet një distancë fizike prej dy metrash.
Italia vazhdon të jetë e paparashikueshme.
Në 24 orët e fundit u rrit numri i rasteve të reja, por numri i viktimave ishte në rënie. Dje, janë regjistruar 3,370 raste të reja dhe gjithashtu 437 persona humbën jetën.
Numri i të vdekurve në total ka shkuar 25, 085 , ndërsa numri i të infektuarve 187,327.
2384 pacientë ndodhen në gjendje kritike për jetën, ndërsa 54,543 persona janë shëruar.
Së fundmi Spanja ka shënuar një rritje të lehtë të numrit të viktimave dhe ulje të numrit të rasteve të reja.
Brenda 24 orëve janë konfirmuar 4,211 raste të reja me koronavirus. Ndërsa, deri më tani, Spanja numëron përgjithësisht 208,389 raste të konfirmuara.
Shifrat e fundit vijnë në një kohë kur kryeministri i Spanjës, Pedro Sánchez, tha se vendi po synonte të hiqte kufizimet e izolimit në gjysmën e dytë të marsit.
Presidenti Donald Trump nënshkroi të mërkurën një urdhër ekzekutiv për të pezulluar imigracionin në Shtetet e Bashkuara për 60 ditë, por me përjashtime për kategori të veçanta. Presidenti Trump e bëri njoftimin në konferencën e përditshme për shtyp për koronavirusin nga Shtëpia e Bardhë.
Për të gjashtën ditë, Kina nuk ka asnjë viktimë. Në 24 orët e fundit janë regjistruar vetëm 10 raste të reja me simptoma dhe 27 pa simptoma.
