Gjatë 24 orëve të fundit nga 242 testime të kryera janë identifikuar 25 raste të reja me koronavirus duke e çuar në 609 numrin e të prekurve.
Dje për herë të parë që nga fillimi i epidemisë Tirana nuk kishte asnjë rast të ri. Por harta e të prekurve nga COVID-19 zgjerohet në Kurbin, Krujë. Nga gjurmimi epidemiologji në Krujë, ku ka shpërthyer vatra më e rrezikshme e përhapjes së COVID-19 në një fasoneri fabrikë këpucësh, ku kanë rezultuar pozitivë 17 persona dhe në Kurbin janë 8 raste të reja.
Ndërkohë, 18 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 345. Aktualisht në vendin tonë janë 238 persona të infektuar aktivë, ku prej më shumë se një jave vijon tendenca ku numri i të shëruarve është më i lartë.
Deri sot, 26 qytetarë e kanë humbur betejën me këtë sëmundje megjithë përpjekjet e stafit mjekësor.
Kruja është vatra e re e nxehtë e COVID-19
Në 24 orët e fundit janë konfirmuar 18 raste të reja në Krujë nga 30 të testuar.
Burimet bëjnë me dije se në rastet e pozitive janë gra punonjëse të fasonerisë, por ka edhe rreth të ngushtë familjarë, kontakte të tyre. Në këtë fabrikë punojnë shumë zonja edhe nga fshatra të Kurbinit, të cilat shkojnë në punë me furgonë.
Ulet numri i të infektuarve ditorë në Kosovë
5 persona janë shëruar, kurse 6 të tjerë kanë rezultuar pozitivë me COVID-19, duke e çuar kështu në 604 numrin e të infektuarve me këtë virus në Kosovë.
Në njoftimin e IKSHPK thuhet se në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 191 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore. Me SARS-CoV-2, janë diagnostikuar gjithsej gjashtë (6) raste. Numri total i të infektuarve ka shkuar në 604, ndërsa gjithsej 18 pacientë kanë ndërruar jetë dhe të cilët kanë pasur sëmundje të tjera shoqëruese.
Deri më sot janë kontaktuar dhe janë nën mbikëqyrje 6.514 kontakte të rasteve.
2.5 milionë njerëz në mbarë botën të infektuar
Më shumë se 2.5 milionë njerëz në mbarë botën janë diagnostikuar me koronavirus. Më shumë se 170,000 kanë vdekur, me SHBA-të ku llogariten rreth një e katërta e të gjitha vdekjeve, sipas të dhënave të përpiluara nga Universiteti Johns Hopkins.
Ndalimi i emigracionit nga Trump mund të zbatohet për ata që kërkojnë status të përhershëm.
Urdhri i ri ekzekutiv i Donald Trump që ndalon emigracionin në SHBA. do të zgjasë 60 ditë me mundësinë e rinovimit, dhe ai do të zbatohet ngushtë për ata që kërkojnë status të përhershëm të emigracionit, tha presidenti i Shteteve të Bashkuara.
Kombet e Bashkuara po paralajmërojnë se uria globale mund të dyfishohet si rezultat i pandemisë së koronavirusit, duke rrezikuar 265 milionë njerëz.
Austria do të lejojë hapjen e bareve, restoranteve dhe kishave më 15 maj, nëse numri i të infektuarve me koronavirus nuk rritet sërish, ka thënë kancelari austriak, Sebastian Kurz të martën. Qendrat tregtare, floktaritë dhe dyqanet tjera të mëdha do të hapen më 1 maj. Austria ka raportuar 491 vdekje deri më tani nga sëmundja COVID-19.
Ministria e Shëndetësisë së Turqisë njoftoi se numri i vdekjeve nga COVID-19 është rritur në 2.259, me 119 viktima të regjistruara në 24 orët e fundit. Ministria theksoi se me 4.611 raste të reja numri i rasteve me COVID-19 është rritur në 95.591.
Australia po përpiqet të kërkojë mbështetje ndërkombëtare për një studim të pavarur të origjinës dhe përhapjes së pandemisë së koronavirusit.
Singapori ka zgjatur masat e izolimit kombëtar deri në 1 qershor pas një numri të madh të rasteve.
Kina raportoi 30 raste të reja në kontinent, 23 prej të cilave përfshinin njerëz që ktheheshin nga jashtë. Komisioni Kombëtar i Shëndetit gjithashtu tha që numri i rasteve asimptomatike u rrit në 42, nga 37 një ditë më parë.
Në Korenë e Jugut, Qendra e Koresë për Kontrollin dhe Parandalimin e Sëmundjeve thotë se vendi kishte 11 raste të reja, dita e katërt me radhë ku numri ka qenë nën 15. Gjashtë raste kanë qenë midis udhëtarëve që vinin nga jashtë shtetit.
/Iconstyle.al
