Numri total i të infektuarve me koronavirus në vendin tonë ka shkuar në 475.
Instituti i Shëndetit Publik ka bërë me dije se gjatë 24 orëve të fundit, në 236 teste të kryera janë identifikuar në total me koronavirus 8 raste të reja.
6 të prekur janë në Tiranë, një është personel shëndetësor në Shkodër, dhe një nga bluzat e bardha në Kukës, që shënon edhe rastin e parë në këtë qytet me COVID-19.
Ndërkohë, 24 qytetarë nuk e kanë fituar betejën me COVID-19, megjithë përpjekjet e jashtëzakonshme të personelit shëndetësor.
Gjatë 24 orëve të fundit, 16 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 248.
Harta e të prekurve nga COVID-19 shtrihet për herë të parë në Kukës dhe zgjerohet në Tiranë dhe Shkodër.
387 të infektuar në Kosovë
Instituti Kombëtar i Shëndetësisë Publike të Kosovës (IKSHPK), ka bërë të ditur se 10 persona kanë rezultuar pozitiv në testin për COVID-19, nga 137 mostra të testuara në Laboratorin e Mikrobiologjisë Molekulare.
“Sot më 14 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 137 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore. Me SARS-CoV-2, pozitiv sot janë diagnostikuar gjithsej dhjetë (10) raste”, thuhet në njoftimin e IKSHPK-së.
Numri i të infektuarve në Kosovë ka arritur në 387, ndërsa IKSHPK njofton se sot shëruar edhe tre persona në 24 orët e fundit. Gjithashtu 8 persona kanë humbur jetën nga COVID-19, të gjithë me sëmundje shoqëruese.
Arrin mbi 2 milionë numri i të infektuarve nga COVID-19
Rreth 2 milionë njerëz në mbarë botën janë konfirmuar tani që janë infektuar me koronavirusin e ri, sipas të dhënave të përpiluara nga Universiteti Johns Hopkins. Më shumë se 120,000 kanë vdekur, ndërsa rreth 450,000 janë shëruar.
FMN thotë se ekonomia globale pritet të zvogëlohet me 3 përqind këtë vit, duke parashikuar rënien më të madhe që nga Depresioni i Madh i viteve 1930
Numri i përgjithshëm i rasteve të koronavirusit në Rusi është rritur në 20,000.
Franca bëhet vendi i katërt në botë që kalon numrin e 15,000 vdekjeve nga koronavirusi.
Suedia thotë se numri i vdekjeve nga koronavirusi në vend ka tejkaluar 1.000.
Vdekjet nga epidemia e COVID-19 në Itali u rritën me 602, nga 566 një ditë më parë, duke shënuar një rritje të dytë të njëpasnjëshme ditore, por infeksionet e reja u ngadalësuan në 2972 nga 3,153, duke shënuar rritjen më të vogël të përditshme që nga 13 Marsi.
Kina pushtohet nga frika e valës së dytë të shpërthimit të COVID-19
Kina raportoi 89 raste të reja të koronavirusit më 13 prill, nga të cilat 86 janë importuar, tha autoriteti shëndetësor.
Numri i madh i rasteve të importuara në vend zgjon frikën e një valë të dytë të rasteve të koronavirusit për shkak të shtetasve kinezë që kthehen në atdheun e tyre nga jashtë.
Austria rihap mijëra dyqane
Austria lejoi mijëra dyqane të rihapen të martën, duke u bërë një nga vendet e para në Evropë që heq masat e kufizimit të vendosura për të ngadalësuar përhapjen e koronavirusit.
Austria veproi herët për të parandaluar virusin duke mbyllur shkollat, baret, teatrot, restorantet, dyqanet jo thelbësore dhe vendet e tjera të grumbullimit afërsisht katër javë më parë. Deri më tani janë shënuar 384 vdekje, më pak se disa vende më të mëdha evropiane. Rritja ditore e rasteve të konfirmuara ka rënë në shifra të ulëta dhe shtrimet në spital janë stabilizuar.
Danimarkë, rihapen shkollat
Me 300 viktima dhe mbi 6700 të infektuar nga koronavirusi, pas një muaji mbylljeje, Danimarka ka rihapur çerdhet, kopshtet dhe shkollat fillore.
Shkollave iu është kërkuar të respektojnë rregulla të caktuara, përfshirë atë të mbajtjes së distancave ndërmjet fëmijëve.
Rihapja e shkollave është hapi i parë i qeverisë daneze që veproi shpejt përballë përhapjes së pandemisë, duke mbyllur kufijtë që më 14 mars, pasi kishte regjistruar rastet e para të infeksionit dhe vdekjeve.
107 viktima në 24 orë në Turqi
Ministri turk i Shëndetësise, Fahrettin Koca, ka konfirmuar 107 viktima të reja nga COVID-19, duke e çuar në 1.403 numrin e përgjithshëm të vdekjeve nga ky virus në vend. Koca po ashtu njoftoi se numri i rasteve të koronavirusit në vend është rritur në 65.111, me 4.062 raste të reja të regjistruara në 24 orët e fundit.
/Iconstyle.al
