Ka shkuar në 182 numri i të shëruarve nga koronavirusi në Shqipëri. Gjatë 24 orëve të fundit, 17 pacientë të tjerë kanë rezultuar negativë në testet për virusin.
Kryeministri Rama përmes një postimi në rrjetet sociale bën me dije lajmin e mirë, teksa shkruan: “Lajm i mirë: 17 të shëruar sot”.
Ndërkohë, ka shkuar në 28 numri i bluzave të bardha të shëruar nga COVID-19, pasi një tjetër infermiere u shërua ditën e djeshme. Kurba e të infektuarve me COVID-19 ka pësuar sërish ulje në javën e katërt, ku janë konfirmuar vetëm 9 raste të reja gjatë 24 orëve, duke çuar numrin e përgjithshëm të të infektuarve në 409.
Pasditen e djeshme, një paciente 72-vjeçare nga Tirana, me inicialet V.S. ka ndërruar jetë për shkak të virusit vdekjeprurës, duke shënuar kështu viktimën e 23-të nga virusi. Pacientja ndodhej në Spitalin Infektiv në QSUT dhe ishte në gjendje të rëndë shëndetësore. 72-vjeçarja vuante nga insuficenca renale kronike, hipertensioni dhe hipotiroidizmi.
Ndërron jetë pacienti i shtatë në Kosovë nga virusi
Ka ndërruar jetë pacienti i 7 nga virusi në Kosovë. Shtetasi Z.I, i lindur më 1948 nga komuna e Gjilanit, i diagnostikuar me COVID 19, ishte shtruar në Klinikën Infektive me datën 31.03.2020 në gjendje të rëndë dhe kishte edhe sëmundje të tjera shoqëruese, thuhet në njoftim.
Virusi COVID-19, që nga 13 marsi kur u paraqit për herë të parë në Kosovë e deri më tani ka infektuar 227 persona, 37 prej të infektuarve janë shëruar kurse 7 kanë humbur jetën.
Komuna me më shumë raste infektimi është Malisheva, ku deri tani janë konfirmuar 66 persona pozitiv në COVID-19.
663 të infektuar në Maqedoni
Numri i përgjithshëm i pacientëve të diagnostikuar me COVID-19 në vend arriti në 663. Ndër të infektuarit është rasti i parë i regjistruar i këtij virusi në Probishtip.
Deri më tani, numri i pacientëve të shëruar është 37, ndërsa numri i vdekjeve 30. Rastet e COVID-19 janë regjistruar në 19 qytete në të gjithë vendin. Shumica e tyre janë regjistruar në Shkup dhe Kumanovë, ndërsa vdekshmëria më e lartë është regjistruar në Strugë dhe Tetovë.
Kryeministri britanik Boris Johnson del nga kujdesi intensiv
Kryeministri britanik Boris Johnson ka dalë nga kujdesi intensiv, tha një zëdhënës mbrëmjen e së enjtes.
“Kryeministri është zhvendosur këtë mbrëmje nga kujdesi intensiv në repart, ku do të marrë monitorim të afërt gjatë fazës së hershme të shërimit të tij,” tha zëdhënësi.
Ky zhvillim u përshëndet edhe nga Presidenti i SHBA-ve, Donald Trump i cili e theksoi atë si inkurajues për popullin amerikan.
Italia do të zgjasë masat izoluese deri më 3 maj
Qeveria italiane po planifikon të zgjasë bllokimin e saj për të frenuar shpërthimin e COVID-19 në vend deri më 3 maj, thanë dy burime për Agjencinë e Lajmeve Reuters pas takimit me ministrat.
Bllokimi, mbyllja e shumicës së bizneseve italiane dhe parandalimi i njerëzve që të largohen nga shtëpitë e tyre për të gjitha nevojat thelbësore, ka filluar që nga 9 marsi dhe do të përfundonte në 13 prill.
Pas një uljeje të dukshme disa ditë më parë, infeksionet e reja janë rritur sërish në dy ditët e kaluara, duke i zhgënjyer të gjithë.
Bashkimi Evropian miraton paketën e shpëtimit
Ministrat e Financave në vendet e Bashkimit Evropian kanë arritur marrëveshje për paketën e shpëtimit në vlerë 500 miliardë euro, e cila synon t’i ndihmojë vendet evropiane të prekura nga pandemia.
Ky vendim vjen pak pasi kryeministri spanjoll, Pedro Sanchez, ka thënë se ky shtet është afër kalimit të fazës më të vështirë të pandemisë, me 152,446 të inektuar dhe më shumë se 15,000 të vdekur.
Edhe kryeministri francez, Bruno Le Maire, ka përshëndetur marrëveshjen, duke e konsideruar si planin më të rëndësishëm në historinë e BE-së.
Kinë, rriten rastet e importuara
Në Kinë janë shënuar 42 raste të reja me koronavirus, ku 38 prej tyre janë të importuara dhe vetëm 4 janë brenda Kinës.
Gjithashtu është shënuar edhe një vdekje në Ëuhan, të provincës Hubei aty ku është edhe epiqendra e virusit. Sot Kina është në ditën e tretë të hapjes, pasi vendi kaloi rrezikun më të madh nga pandemia dhe jeta po kthehet në normalitet.
Në Kinë numri total i rasteve me koronavirus ka shkuar në 81 mijë e 907 raste, ndërsa numri i viktimave ka shkuar në 3 mijë e 336 të vdekur
/Iconstyle.al
