Numri i përgjithshëm i të infektuarve me koronavirus ka arritur shifrën 400 në Shqipëri.
Në 24 orët e fundit janë testuar 236 persona të dyshuar, prej të cilëve janë konfirmuar 17 raste të reja me COVID-19. Deri në këto momente janë testuar 2989 raste të dyshuara dhe prej tyre janë të konfirmuar pozitivë me COVID-19, 400 raste. Fatmirësisht nuk ka viktima nga COVID-19 në 24 orët e fundit dhe deri tani, betejën me këtë sëmundje e kanë humbur 22 qytetarë.
Lajmi i mirë është se gjatë 24 orëve të fundit, 23 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 154. Në shërbimin infektiv aktualisht janë 52 të shtruar. 5 prej tyre janë në terapi intensive. Në spitalin COVID 2 “Shefqet Ndroqi”, janë 6 pacientë të shtruar gjithsej. Nga këta 5 pacientë janë në terapi intensive, 1 në pavion, ndërsa 4 pacientë janë të intubuar.
Në dy spitalet COVID aktualisht po marrin shërbim 58 pacientë.
6 viktima nga koronavirusi në Kosovë
Një grua 66-vjeçare nga Malisheva është viktima e gjashtë në Kosovë nga koronavirusi, ka bërë të ditur Ministria e Shëndetësisë.
Ashtu si të gjithë pacientët që kanë humbur betejën me këtë sëmundje, edhe 66-vjeçarja ka pasur sëmundje të tjera shoqëruese.
“Sot më 08.04. 2020 në Klinikën Infektive të QKUK-së ka përfunduar me vdekje pacientja 66 vjeçe, nga Malisheva, e cila ka qenë e diagnostikuar me Covid-19. E njëjta ka pasur edhe sëmundje të tjera shoqëruese. Kjo është vdekja e gjashtë e shënuar në Kosovë nga Covid-19”, bëhet e ditur përmes një komunikate për media.
Ndërkaq, të mërkurën gjatë ditës janë konfirmuar edhe 14 raste të reja me koronavirus, duke e çuar në 184 numrin e të infektuarve në Kosovë.
812 të vdekur në Turqi nga koronavirusi
Numri i të vdekurve në Turqi nga koronavirusi i ri (COVID-19) është rritur në 812, njoftoi Ministrisa e Shëndetësisë e vendit.
Numri i rasteve të konfirmuara me COVID-19 është rritur në 38.226 në Turqi, pasi 4.117 njerëz të tjerë kanë rezultuar pozitivë në teste, treguan të dhënat e fundit të ministrisë. Deri më tani, gjithsej 1.846 pacientë janë shëruar plotësisht nga sëmundja, ndërsa rreth 1.592 të tjerë po mbahen nën kujdes intensiv.
Franca do të shtyjë masat e izolimit përtej 15 prillit
Franca është në izolim që nga 17 marsi për të ngadalësuar përhapjen e epidemisë, por shtetit do të zgjasë izolimin në gjithë vendin, të vendosur për të ngadalësuar përhapjen e koronavirusit.
Izolimi “do të zgjatet” përtej 15 prillit, tha një zyrtar i presidencës, për agjencinë AFP.
Presidenti francez, Emmanuel Macron, pritet t’i drejtohet përsëri kombit javën tjetër, njoftoi Presidenca Franceze. Ky pritet të jetë adresimi i tretë i Macronit dhe i pari nga Pallati Elysee, që prej fillimit të krizës.
Të mërkurën, në Francë u raportuan 541 vdekje të tjera nga COVID-19 , duke e çuar numrin e përgjithshëm në 10,869
1,5 mln raste të konfirmuara në mbarë botën
Deri tani ka rreth 1.5 milione raste të konfirmuara me koronavirus në mbarë botën. Shtetet e Bashkuara dhe Mbretërinë e Bashkuar pësuan numrin më të madh të vdekjeve në një ditë të vetme që nga fillimi i shpërthimit.
Por në vendet përfshirë Korenë e Jugut dhe Zelandën e Re, ka prova që izolimi, testimi, monitorimi dhe karantinat mund të ndihmojnë në ngadalësimin e përhapjes së virusit.
Të dhënat e mbledhura nga Universiteti Johns Hopkins tregojnë se nga 1.5 milionë njerëz me COVID-19, sëmundja e shkaktuar nga koronavirusi, afro 330,000 janë shëruar. Më shumë se 88.500 njerëz kanë vdekur ndërsa SHBA raportoi 1,850 vdekje të mërkurën, dhe MB, 938 në 24 orë.
Kina po përballet me përhapjen e virusit në provincën verilindore
Rastet e koronavirusit të sjella në Kinë nga jashtë kanë arritur nivelin e tyre më të lartë brenda dy javësh, me provincën verilindore të Heilongjiang që po nxiton të ndërtojë një spital të ri pasi shumë raste kanë ardhur nga Rusia.
Komisioni Kombëtar i Shëndetit raportoi të mërkurën 63 raste të reja, me 61 të ardhura nga jashtë. Kjo është më e larta që nga 25 marsi.
Vendi ka vendosur rregulla të rrepta karantine për këdo që arrin në Kinë nga jashtë.
/Iconstyle.al
