Ka shkuar në 21 numri i viktimave nga koronavirusi në Shqipëri. Dje ndërroi jetë ish-boksieri Skënder Kurti, i cili kishte pësuar vdekje klinike prej ditësh si pasojë e komplikacioneve nga virusi.
Ndërkohë në vendin tonë janë konfirmuar 28 raste me koronavirus në 24 orët e fundit, mes tyre edhe një fëmijë.
Numri total i të infektuarve në vendin tonë ka shkuar në 361 ndëra mosha meshatare e të prekurve është 50. Në Spitalin e Infektivit janë duke marrë mjekim 64 persona, 5 prej të cilëve ndodhen në terapi intensive dhe një në intubim. Ndërkohë, lajmi i mirë është se 104 persona janë shëruar duke ia dalë të mposhtin virusin.
145 të infektuar me virus në Kosovë
Gjashtë persona të infektuar me koronavirus u konfirmuan dje në Pejë. Të prekurit janë persona kontakti të rastit të parë; 5 persona janë nga fshati Llugagji dhe një në qytet. Ndërkohë i gjithë fshati Llugagji është në karantinë, raporton Telegrafi.
Deri më tani në Kosovë numri i të prekurve me COVID-19 ka shkuar në 145, ndërsa 23 të tjerë janë shëruar. Një i moshuar 82-vjeçar ka ndërruar jetë nga koronavirusi.
73 viktima në 24 orë në Turqi
Numri i vdekjeve nga koronavirusi në Turqi është rritur me 73, duke e çuar numrin e përgjithshëm në 574. 3.135 raste të reja u konfirmuan dje, gjithsej 27.069, tha ministri i Shëndetësisë Fahrettin Koca.
Ai shtoi në Twitter se më shumë se 20.000 njerëz janë testuar me Covid-19 në 24 orët e fundit.
Amerika po përgatitet për skenarin më të keq
Shtetet e Bashkuara hynë në një nga javët më kritike deri më tani në krizën e koronavirusit. Zyrtarët e qeverisë kanë paralajmëruar se numri në rritje i vdekjeve në shtete të tilla si New York, Michigan dhe Luiziana ishte një shenjë e krizës që do të përhapet në shtete të tjera.
“Kjo do të jetë java më e vështirë dhe më e trishtueshme e jetës së shumicës së amerikanëve, sinqerisht. Ky do të jetë momenti Pearl Harbour, momenti 9/11, vetëm se nuk do të lokalizohet”, tha gjenerali amerikan Jerome Adams në Fox News të dielën.
Dritë shprese në Itali dhe Spanjë!
Evropa filloi të shohë dritë shprese me numrin e vdekjeve në Itali në nivelin më të ulët në më shumë se dy javë dhe kurbën e infeksioneve me një pjerrësi rënëse. Në Spanjë, numri i vdekjeve është ulur gjithashtu.
Deri në 25 mars, virusi sipas tyre përhapej me një ritëm ditor prej 20%. Që atëherë niveli ka rënë nën 12%, duke dëshmuar kështu se urdhërat e ndalim-qarkullimit po japin rezultat. Si në këtë vend, ashtu dhe në Itali ka pasur një numër të lartë të vdekjeve mes stafit mjekësor në vijën e parë të frontit.
Boris Johnson shtrohet në spital
Kryeministri britanik Boris Johnson, u shtrua në një spital në Londër të dielën në mbrëmje me “simptoma të vazhdueshme”, përfshirë temperaturë.
Thuhet se ky është një “hap paraprak” i marrë me këshillën e mjekut të tij.
Kryeministri mbetet në krye të qeverisë, por sekretari i jashtëm pritet të kryesojë një takim në lidhje me koronavirusin të hënën në mëngjes.
Në nivel global, numri i vdekjeve nga COVID-19, po afrohet në 70,000, sipas të dhënave të përpiluara nga Universiteti Johns Hopkins, ndërsa numri i infeksioneve u rrit mbi 1.27 milionë.
Apple do të prodhojë 1 milion maska fytyre në javë
Apple thotë se do të prodhojë një milion maska për fytyrën në javë për punonjësit e mjekësisë që luftojnë kundër pandemisë së koronavirusit.
Shefi ekzekutiv Tim Cook thotë se kompania ka hartuar maskën e saj mbrojtëse transparente të fytyrës dhe ka filluar prodhimin masiv në fabrikat e saj në SHBA dhe Kinë.
“Ne planifikojmë të dërgojmë mbi një milion deri në fund të kësaj jave,” thotë ai, duke shtuar se shpërndarja fillestare do të përqendrohet në SHBA.
Rriten rastet e infektimit në Kinë
Kina raportoi 39 raste të reja me koronavirus të dielën, të gjitha, përveç njërit, të importuara nga jashtë, pasi numri i rasteve asimptomatike gjithashtu është rritur.
Komisioni Kombëtar i Shëndetit tha që 78 raste të reja asimptomatike ishin identifikuar të dielën, krahasuar me 47 një ditë më parë.
Vetëm një vdekje e re u regjistrua në 5 Prill, sipas të dhënave të reja.
/Iconstyle.al
