Mbrëmjen e djeshme është shënuar viktima e 12 nga koronavirusi në Shqipëri.
Pacientja 82-vjeçare L. M., nga Tirana, ishte prej 5 ditësh në terapi intensive. Dy ditët e fundit gjendja e 82-vjeçares ishte rënduar së tepërmi dhe pavarësisht përpjekjes së stafit mjekësor, nuk arriti të mbijetojë.
Vetëm gjatë ditës së djeshme janë shëruar 8 persona të infektuar me koronavirus.
Lajmin e ka bërë të ditur ministrja e Shëndetësisë, Ogerta Manastirliu, e cila në një postim në Facebook thotë se numri total i të shëruarve ka shkuar në 52.
Ndërkohë në 24 orët e fundit janë shtuar 11 raste të reja me koronavirus, duke e çuar numrin e përgjithshëm të të infektuarve në 223.
Fshati në Kosovë kthehet i gjithi në karantinë
Ministria e Punëve të Brendshme dhe Administratës Publike ka marrë vendim që fshati Topanicë i Komunës së Kamenicës në Kosovë, të shpallet zonë karantinë, pasi një person i infektuar me COVID-19 dyshohet se ka pasur kontakt me banorët tjerë, raporton “Telegrafi”.
Instituti Kombëtar i Shëndetësisë Publike të Kosovës (IKSHPK) ka njoftuar se në 24 orët e fundit janë identifikuar edhe 12 raste të reja të infektuar me koronavirus, duke çuar kështu në 106 numrin e peronave të prekur me COVID-19 në Kosovë.
Greqi/ Shkon në 44 numri i viktimave
Në Greqi është shënuar viktima e 44 nga koronavirusi. Ai është një 79-vjeçar nga Ptolemaidha.
Gjithsej në Greqi janë 1,061 raste me pacientë të infektuar, ku 66 prej tyre janë në gjendje kritike për jetën.
Vijon bilanci tragjik në Itali dhe Spanjë
Numri i vdekjeve nga pandemia e koronavirusit në Itali u rrit me 812 në 11.591 në total, ndërsa numri i përgjithshëm i infeksioneve u rrit me 4,050 raste të reja në 100,000.
Më shumë se 800 njerëz vdiqën në Spanjë gjatë 24 orëve të fundit – duke arritur në bilancin tragjik 7,340 viktima- ndërsa vdekjet e Iranit u rritën me 117 në 2.757.
Ndërkohë, Presidenti amerikan Donald Trump zgjati udhëzimet federale për distancimin shoqëror deri në 30 prill pasi një zyrtar i lartë shëndetësor paralajmëroi se 100,000 deri 200,000 njerëz mund të vdisnin nga koronavirusi në Shtetet e Bashkuara.
SHBA ka mbi 159,000 infeksione të konfirmuara, më shumë se çdo vend tjetër në botë.
Në të gjithë botën, numri i përgjithshëm i infeksioneve të regjistruara që nga fillimi i shpërthimit të eidemisë arriti në më shumë se 775,000. Rreth 160,000 njerëz janë shëruar globalisht ndërsa rreth 37,000 kanë vdekur.
Trump: Më shumë se 1 milion amerikanë u testuan për koronavirus
Trump tha se më shumë se 1 milion amerikanë ishin testuar për koronavirus dhe u bëri thirrje njerëzve që të vazhdojnë të zbatojnë masat për distancimin social deri në prill për të parandaluar përhapjen e virusit.
“Secili prej nesh ka një rol për të fituar këtë luftë. Çdo qytetar, familje dhe biznes mund të bëjë ndryshimin në ndalimin e virusit,” tha presidenti.
“Kjo është detyra jonë e përbashkët patriotike. Kohë sfiduese janë përpara për 30 ditët e ardhshme dhe ky një 30 ditësh shumë i rëndësishëm”, u tha Trump gazetarëve në Shtëpinë e Bardhë.
Francë, rritet numri i rasteve të dhunës në familje!
Franca njoftoi se do të paguante për qëndrimin në hotel të viktimave të dhunës në familje dhe qendrat e këshillimit, pasi shifrat treguan se numri i rasteve të abuzimit ishte rritur gjatë javës së parë të izolimit për të frenuar përhapjen e koronavirusit.
Ministrja e Barazisë Gjinore Marlene Schiappa tha se rreth 20 qendra do të hapeshin në disa dyqane në të gjithë vendin, në mënyrë që gratë të mund të kërkonin ndihmë ndërsa blejnë sende ushqimore.
Qeveria njoftoi gjithashtu një milion euro shtesë (1.1 milionë dollarë) për organizatat kundër dhunës në familje për t’i ndihmuar ato t’i përgjigjen kërkesës së rritur për shërbim.
Franca raportoi numrin më të lartë të vdekjeve në 24 orë që nga fillimi i epidemisë së koronavirusit, 418 njerëz kishin vdekur në spital, duke e çuar numrin total në 3.024.
Izolimi i Italisë do të shtrihet deri për Pashkë
Ministri italian i Shëndetësisë, Roberto Speranza njoftoi se izolimi kombëtar do të zgjatet “të paktën deri në Pashkë”.
Pashka festohet më 12 prill dhe izolimi aktual përfundon më 3 prill.
Këshilltarët e qeverisë kanë rekomanduar zgjatjen e “të gjitha masave së paku deri për Pashkë”, tha Speranza në një deklaratë.
Numri i vdekjeve në Turqi nga koronavirusi rritet në 168
Rreth 37 njerëz të tjerë vdiqën nga koronavirusi në Turqi në 24 orët e kaluara, sipas shifrave të publikuara nga Ministria e Shëndetit e vendit duke e çuar numrin e vdekjeve në 168.
Numri i përgjithshëm i rasteve të konfirmuara të koronavirusit u rrit në 10.827 pasi 1.610 më shumë njerëz rezultuan pozitivë, sipas ministrisë.
Numri i vdekjeve në Mbretërinë e Bashkuar rritet në 1.408
Numri i vdekjeve nga koronavirusi në Mbretërinë e Bashkuar u rrit në 1.408, sipas shifrave të deklaruara të cilat paraqesin një rritje më të ulët se numri i mëparshëm i këtij bilanci tragjik.
/Iconstyle.al
