Mbrëmjen e sotme në një lidhje me Skype për emisionin ‘Repolitix’, mjeku Pëllumb Pipero ka folur me shumë rreth situatës aktuale në vendin tonë.
Ai tha se është e vështirë për t’u parashikuar, megjithatë pjesa më e vështirë sipas tij ka kaluar.
Pipero tha se ulja e kurbës do të jetë graduale dhe gjysma e dytë e kësaj epidemie do të jetë më e gjatë në kohë dhe se masat duhet të lehtësohen gradualisht.
“Një javë e re me më pak numra, dëshmon një trend të rënies së epidemisë në vendin tonë, shpresojmë që të vijojë kështu edhe pse është e pamundur për të bërë parashikime. Tani është java e tretë, kemi një rënie të numrave cka besoj fort se shkon në logjikën apo ecurinë e kësaj epidemie edhe në vendet e tjera dhe do të thotë se e kemi kaluar pikun dhe sheshpushimin dhe besoj se kemi. filluar uljen. Ulja do të jetë graduale, gjysma e dytë e kësaj epidemie do të jetë më e gjatë në kohë, duhet të mos ulet vigjilenca. Jam partizan i lehtësimit gradual të masave në vendin tonë në raport me ecurinë e epidemisë sa kohë kufijtë janë të bllokuar dhe gjithcka ndodh brenda nesh.”- tha ai.
Më tej, Pipero shtoi se nuk është ende koha që mosha e tretë të jetë e lirë dhe se ajo kërkon një fashë orari të veçantë për të dalë.
Por kur përfundon kjo situatë e shkaktuar nga koronavirusi dhe si do të evolojë procesi i zbutjes së masave?
“Është e pamundur parashikimi. Ne studiojmë ecurinë e kurbave dhe shikojmë ecurinë vendet e tjera, Kina, Italia, Franca, Amerika, etj. Në opinionin tim, jo parashikim, por opinion, është që ecuria e pandemisë ka qenë e zbutur, numrat janë në rënie, t’ia lëmë kohës ta vërtetojë. E pamundur të parashikojmë kur do të shuhet tërësisht. Epidemia do të quhet e tejkaluar më së paku 4 muaj nga fillimi, por një muaj duhet pa raste të reja.
Nëse do të konsideronim fundin e qershorit, do të thotë nga fundi i majit në fund të qershorit nuk duhet të ketë asnjë rast për ta cilësuar të tejkaluar, po ashtu edhe në vendet e tjera, pasi bota është e hapur. Ne duhet të përgatitemi për një zgjatje, gjysmë të dytë relativisht të gjatë, duke konsideruar se gjysma e parë unë e quaj të kaluar. Në këtë këndvështrim duhet që edhe për disa javë të jemi vigjilentë. Të respektohen vendimet e marra nga qeveria. Këtu do të kalojë me më pak dhimbje se në vendin tonë” tha ai.
