Në Kosovë janë shënuar dy rastet e para të personave të infektuar me Koronavirus.
Virusi famëkeq që ka përfshirë gjithë botën, përfshirë edhe Shqipërinë me 33 të infektuar dhe 1 viktimë, ka mbërritur tashmë edhe në Kosovë.
Kryeministri i Kosovës, Albin Kurti dhe ministri i Shëndetësisë, Arben Vitia mbajtën një konferencë të përbashkët për media, ku konfirmuan dy rastet e para me COVID-19.
Sot janë testuar mbi 15 persona nga Instituti Kombëtar i Shëndetësisë Publike të Kosovës, derisa 2 prej tyre kanë rezultuar pozitivë, njoftoi ministri i Shëndetësisë.
“Ju njoftoj se MSH pas përfundimit të analizave në IKSHPK të 15 rasteve të dyshimta, dy kanë rezultuar pozitive dhe gjendja e tyre shëndetësore rezulton të jetë e qëndrueshme, njëri është i moshës 20 vjeçare dhe tjetri i moshës mbi 70 vjeçare. Janë marrë të gjitha masat kundër personave me të cilët ata kanë qenë në kontakt”, tha ministri Arben Vitia.
Pacientët janë të shtruar në Klinikën Infektive në QKUK. Pacientja e parë është një shtetase italiane e moshës 20-vjeçare, dhe i dyti është një shtetas kosovar 77-vjeçar.
Kurti bëri thirrje të mos bëhet panik dhe që qytetarët të qëndrojnë sa më shumë në shtëpi.
“Ftohen të gjithë qytetarët që pa panik e me kujdes t’i përmbahen këshillave me kujdes të shtuar ato që janë nxjerrë nga institucionet e shtetit. Të gjithë së bashku do t’ia dalim edhe në këtë betejë”, tha Kurti.
Pak orë më parë, Policia e Shtetit ka hedhur poshtë informacionin që u përhap nga disa media kosovare për mbylljen e kufijve mes Shqipërisë dhe Kosovës.
Për këtë pjesë, Kurti, tha se është diskutuar, por kjo sipas tij, do të ndodhë pjesërisht.
