Një ditë pas lajmit të tmerrshëm të publikuar në median britanike “Daily Mail”, ku denoncoheshin kushtet skandaloze ku mbahen kafshët e egra, në një kopsht zoologjik në qytetin e Fierit, ka reaguar ministri i Mjedisit dhe Turizmit, Blendi Klosi.
Ai ka urdhëruar inspektimin e kopshtit zoologjik privat në Fier. Inspektorati i Mjedisit në bashkëpunim me Policinë e Fierit dhe Shoqatën për Mbrojtjen e Kafshëve kanë vendosur të zhvendosin kafshët me qëllim marrjen e tyre në mbrojtje.
“Në përgjigje të lajmit të publikuar në Daily Mail dhe dhjetëra mesazheve për situatën e papranueshme, ku jetojnë disa kafshë në një kopsht zoologjik privat në Fier, urdhërova urgjentisht nisjen e një aksioni nga Inspektorati i Mjedisit, i cili në bashkëpunim me Policinë e Fierit dhe Shoqatën për Mbrojtjen e Kafshëve kanë vendosur të zhvendosin kafshët me qëllim marrjen e tyre në mbrojtje nga kjo e fundit. Aksioni do të vijojë edhe nesër deri në zgjidhjen përfundimtare të kësaj ngjarje të turpshme! “, thekson Klosi.
Ditën e djeshme, media britanike e quante kopshtin zoologjik, “Kopshti zoologjik i ferrit”.
Në fotot e bëra publike, kafshët e burgosura jetonin në kushte aspak të përshtatshme.
Një fotograf anonim, i cili ka fotografuar gjendjen e këtyre kafshëve tha për “Daily Mail” se këto ishin kushtet më të tmerrshme që kishte parë ndonjëherë për mirëqenien e kafshëve:
“Kafshët vuajnë nga një sërë çështjesh fizike dhe psikologjike të shkaktuara nga kushtet e mjerueshme, kujdesin veterinar dhe mungesa e një diete të përshtatshme”.
