Ditën e sotme, në qytetin e Durrësit janë konfirmuar dy raste të reja të prekura me Covid-19.
Të infektuarit janë burra të moshës 71 dhe 77 vjeç, të cilët nuk kishin lidhje me njëri-tjetrin.
Sipas burimeve spitalore, djali i 71-vjeçarit dhe bashkëshortja e tij kishin temperaturë të lartë, ndërsa ende nuk ka të dhëna për personin tjetër.
Megjithatë, askush prej të prekurve nuk ka histori udhëtimi dhe nuk dihet nga ka ardhur infektimi i tyre.
Dy rastet e reja e çojnë në 14 numrin e personave të prekur në Durrës.
Deri tani, Ministria e Shëndetësisë ka konfirmuar 212 persona të prekur nga Covid-19 në Shqipëri, ndërsa numri i jetëve të humbura ka shkuar në 10.
