Një tërmet i fuqishëm me magnitudë 6.5 të shkallës Rihter ka goditur Kolumbinë në orët e para të mëngjesit të sotëm, duke shkaktuar panik në disa nga qytetet kryesore të vendit. Lëkundjet janë ndier në një distancë të gjerë, duke përfshirë edhe kryeqytetin Bogota, ku qytetarët dolën me shpejtësi në rrugë, të alarmuar.
Sipas Agjencisë Kombëtare Gjeologjike të Kolumbisë, epiqendra e tërmetit është lokalizuar në afërsi të zonës Paratembueno. Të dhënat e Qendrës Sizmologjike Evropiane-Mesdhetare tregojnë se lëkundjet janë regjistruar rreth 63 kilometra në verilindje të qytetit Villavicencio dhe 21 kilometra në lindje të Medinës, në një thellësi që varion nga 10 deri në 35 kilometra, një faktor që mund të ketë ndikuar në intensitetin e ndjeshëm të tërmetit.
Tërmeti u regjistrua rreth orës 08:08 të mëngjesit, sipas kohës lokale, dhe është ndier në një rreze deri në 700 kilometra, duke përfshirë një zonë me rreth 27 milionë banorë.
Deri më tani nuk raportohet për viktima, por autoritetet janë në gatishmëri dhe po kryejnë inspektime në terren për të vlerësuar nëse ka dëme materiale apo pasoja të tjera.
