Vampirët janë në krye të piramidës së përbindëshave në filmat horrorë, dhe fansat e tyre kanë shijuar versionet e ndryshme të tyre në ekran, pothuajse që në fillimet e kinematografisë.
Por kur është fjala për të treguar historinë e Dracula-s, ka dy probleme shumë të mëdha.
I pari është i thjeshtë: Ai është vampiri më i famshëm i të gjitha kohërave dhe kjo e bën të vështirë që të befasosh fansat e filmave për të.
I dyti është se të gjithë mendojnë se e dinë se përse flet historia e Dracula-s, kështu që kushdo që merr përsipër të tregojë historinë tij nga e para, është duke luftuar dhjetëra ide që njerëzit tashmë kanë krijuar në kokë për personazhin më negativ të filmave të të gjitha kohërave.
Këtu qëndron edhe çështja kryesore me një prej adaptimeve më të reja të Dracula-s, prodhuar nga BBC dhe transmetuar në NETFLIX.
Krijuesit e “Sherlock”, Mark Gatiss dhe Steven Moffat, kanë sjellë një adaptim të ri të Dracula-s, me tre episode 90-minutëshe, që ka një qasje moderne ndaj historisë së vampirit të famshëm.
Në fakt, gjithçka nis si një histori e njohur tashmë, me ardhjen e avokatit Jonathan Harker në kështjellën misterioze rumune në Transilvani, ku Drakula ka kaluar shekuj duke u ushqyer me gjakun e fqinjëve të tij.
Por historia tregohet nga vetë Jonathan, i cili ndodhet i mbyllur në një manastir, dhe i shkatërruar si nga ana fizike, por edhe nga ajo shpirtërore. Ai tregon se Konti Dracula e kishte punësuar si një agjent për ta zhvendosur drejt Anglisë, (me shpresën se atje do të gjente versione më të shijshme të gjakut).
Në fillim, Dracula shfaqet si një njeri shumë i plakur dhe i thinjur, por me kalimin e kohës, pasi ushqehet me gjakun e ri në kështjellën e tij, ai merr formën e tij të plotë dhe bëhet më i fortë.
E gjithë historia në pjesën e parë tregohet nga vetë Jonathan, i cili merret në pyetje nga një grua e apasionuar pas historisë së Dracula-s, e maskuar si murgeshë. Në fakt, ajo është versioni femër i Dr. Van Helsing, që mban të njëjtin mbiemër, Agatha Van Helsing dhe historia bëhet edhe më tërheqëse kur një femër i kundërvihet vampirit më të frikshëm.
Mos prisni një Dracula romantik!
Episodi i dytë flet për udhëtimin e Kontit drejt Anglisë dhe marrëdhënien e tij me personazhet e ndryshme që udhëtojnë me të në anije, përfshi edhe një çift homoseksualësh, që nuk është se mishëron romancën e vërtetë që presim të shohim ndonjëherë në filmat me vampirë.
Në fakt, ndërkohë që Dracula e Francis Coppola-s (1992) ishte një hero romantik, ky i yni i vitit 2020, nuk i afrohet.
Adaptimi i ri i Gattiss and Moffat përqëndrohet shumë te personazhi i Drakulës së luajtur me mjeshtëri nga aktori danez, Claes Bang, por sjell një version mjaft narcist të tij, të cilit i mungon plotësisht ndjeshmëria dhe qëllimisht shkakton dhimbje ndaj të tjerëve pa asnjë keqardhje.
Teknologjia është ajo që shkatërron gjithçka!
Dracula përfundimisht arrin në tokën e premtuar në episodin e tretë, por kanë kaluar qindra vjet. Ai nis nga e para historinë e tij në mes të kohërave moderne dhe këtë herë, do t’i vihet pas sërish një femër që është pasardhësja e Van Helsing.
Në momentin kur ajo e vë pas hekurave këtë përbindësh, dhe nis ta studiojë, ndodh e papritura! Dracula-s i jepet një tablet dhe historia kthehet në një komedi të zezë që ka zhgënjyer shumë shikues anembanë botës.
Vendosja e Dracula-s, përballë fenomeneve të kohës moderne si fashionistat e Instagramit, apo rëndësisë që kanë liritë dhe të drejtat e njerëzve (prej të cilave përfiton edhe vetë vampiri ynë) e tjetërson historinë dhe sjell një kthesë të padëshirueshme për admiruesit e historisë klasike!
Autorët e serialit duken shumë të dashuruar me Dracula-n për t’i dhënë atij tmerrin e duhur, por duhet ta pranojmë se ka disa efekte të pabesueshme që na japin disa skena vërtet të frikshme.
Megjithatë, ata që nuk janë apasionuar pas historive klasike të Dracula-s mund t’i japin një shans filmit dhe në fund të fundit mund të rezultojë një argëtim i frikshëm, nëse e lejoni.
