Deklarat e bërë së fundmi nga presidenti i Serbisë, Aleksandër Vuçiç, ka trazuar ujërat mes Serbisë dhe Kosovës.
Duke iu referuar luftimeve në Nagorno-Karabak, ai tha se kjo tregon se konfliktet e ngrira mund të përshkallëzohen në çdo moment. Teksa shtoi në fjalën e tij se në rast të mos-arritjes së një marrëveshje, një konflikt i ngjashëm mund të ndodhte mes dy vendeve, andaj ai “do bëjë gjithçka për të vazhduar negociatat” në mënyrë që të evitohet një skenar i tillë.
“Është e rëndësishme t’iu them se konflikti Nagorno-Karabak tregon se konfliktet e ngrira mund të përshkallëzohen në çdo moment. Situata me Kosovën nuk do të jetë e lehtë në muajt e ardhshëm. Nuk duhet t’ua lëmë fëmijëve tanë konfliktin e ngrirë. Mesazhi më i rëndësishëm për ne është mesazhi i paqes dhe dialogut. Ne duhet të kujdesemi për të ardhmën e fëmijëve tanë”.
I menjëhershëm ka qenë reagimi i Presidentes së Kosovës Vjosa Osmani, e cila ka kërkuar reagim të Bashkimit Europian dhe NATO-s.
“Pres që Bashkimi Evropian dhe NATO t’iu përgjigjen kërcënimeve për luftë të dhunshme, të bëra nga Vuçiç”, ka thënë Osmani.
Sakaq, edhe ministrja e Jashtme e Kosovës Meliza Haradinaj-Stublla ka reaguar ashpër, duke e cilësuar Aleksandër Vuçiçin “këlyshin e Rusisë” që po tenton bashkë me Moskën që të minojnë stabilitetin në Ballkan.
“Pasi furnizoi me armë konfliktin Nagorno-Karabak, me armë të prodhuara nga Serbia, Aleksandar Vuçiç, ministri i Informacionit në kohën e Millosheviçit, tani po kërcënon të gjithë NATO-n, si dhe po nxit vendet fqinje për përgatitje ushtarake për luftëra të reja në Ballkan.
Politika dhe qasja e “këlyshit Rusisë” është qartazi kundër vlerave të BE-së dhe politikave të sigurisë së Ballkanit. Të gjitha përpjekjet ruse dhe serbe për të minuar paqen, stabilitetin dhe sigurinë e rajonit janë të papranueshme për Kosovën dhe, me siguri, do të dështojnë, njësoj sikurse kapitullimi i tyre famëkeq në 1999-n” tha ajo.
