Mbrëmjen e djeshme, këngëtarja Rita Ora ndezi “Sheshin Skënderbej”, teksa miksoi këngën e saj “Black Widow” me ritmet e “Valles së Rugovës”. Rita, madje kërceu bashkë me trupën e saj të kërcimtarëve, vallen shqiptare duke sjellë një atmosferë emocionuese për 250 mijë shqiptarët që e ndoqën në shesh.
Mirëpo, jo të gjithë e kanë mikëpritur këtë surprizë të këngëtares. Këngëtarja Gjyste Vulaj, e ftuar në emisionin “Rudina” në televizionin “Klan”, tha se Rita nuk ka pyetur aspak për të drejtat e autorit të “Valles së Rugovës”.
Sipas Gjyste Vulajt, remixi i asaj kënge është punuar disa vite më parë nga bashkëshorti i saj, Sokoli. Por gjithsesi, këngëtarja e hitit “S’jam për ty” theksoi se është bukur ta shihje Ritën, teksa kërcente me vallen shqiptare.
“Tani për koncertin e Rita Orës s’dua të flas sepse ajo ka përdorur një insert të muzikës së Sokolit pa pyetur, por unë i uroj suksese. Është ‘vallja e Rugovës’. Atë version e ka bërë Sokoli para shumë-shumë vitesh, diku 15-16 vjet më parë. Si kolegë që jemi duhet të kishte pyetur, por gjithsesi Rita Ora na ka zbardh fytyrën. Megjithëse u pendova që e thashë”,- u shpreh këngëtarja.
