Kërkesat e shumta që ka për të zënë një vend në çerdhe, e kanë detyruar Qendrën Ekonomike të Zhvillimit dhe Edukimit të Fëmijëve (QEZHEF), pranë Bashkisë së Tiranës, që të nisë regjistrimet që në muajin qershor. QEZHEF lajmëron prindërit se regjistrimet do të nisin në fund të muajit qershor dhe duhet t’i drejtohen çerdhes më të afërt pranë vendbanimit të tyre.
“Aplikimet zyrtare për regjistrimin e fëmijëve në çerdhet e Bashkisë së Tiranës do të kryhen në datat 25-29 qershor 2018 nga ora 09:00-14-00”, shkruhet në njoftimin e bërë nga Drejtoria e Çerdheve.
Çdo vit përllogariten rreth 7 mijë aplikues për të zënë një vend në çerdhe dhe nisur nga kjo dyndje, ndërkohë që kapaciteti është më i vogël, Drejtoria e Çerdheve ka përcaktuar disa kategori social-ekonomike që kanë prioritet. Fëmijët jetimë, ata me aftësi të kufizuara apo kur kanë prindër të tillë, fëmijët e familjeve që trajtohen me ndihmë ekonomike dhe ata me një prind apo të divorcuar ku kujdestari ligjor trajtohet me pagë minimale, janë disa nga kategoritë të cilat janë të favorizuara për t’u përzgjedhur.
Me një vendim të Këshillit Bashkiak në muajin mars 2018, të gjitha kategoritë e mësipërme jo vetëm që do të jenë të parat në listë për t’u regjistruar, por do ta përfitojnë këtë shërbim falas. Dokumentacioni që duhet të paraqesin për t’u regjistruar është i njëjtë me vitin e kaluar.
Përveç këtyre, kategoritë favorizuese nevojitet gjithashtu të dorëzojnë edhe dokumentin që vërteton kategorinë socio-ekonomike, të cilës i përkasin. Të gjitha dokumentet mund të shkarkohen në sistemin elektronik e-albania, ose mjafton një fotokopje e kartës së identitetit pranë komisionit dhe plotësimi i një deklarate personale që aplikimi të cilësohet i kryer.
Dokumentacioni:
-Certifikatë personale e fëmijës
-Certifikatë familjare
-Vërtetim pune nga prindërit
-Vërtetim banimi
Burimi: Panorama
