Të jesh nënë është një nga ndjenjat më të bukura në botë, por njëkohësisht edhe e vështirë. E njëjta gjë është edhe nëse je Princeshë!
Dukesha e Kembrixhit, 35-vjeçarja Kate Middleton, në një diskutim të rrallë publik ka folur për mëmësinë dhe pasojat e këtij statusi.
“Sa më përket mua ka qenë një përvojë e shkëlqyer”, rrëfeu nëna e George, 3 vjeç e gjysmë dhe Charlotte, 1 vjeçe. Ndërkaq, sapo ka dalë lajmi se princesha është në pritje të fëmijës së tretë.
“Megjithatë, shumë shpesh kthehet në një sfidë të vërtetë edhe për mua që mund të kem ndihmën e shumë të tjerëve, fat që pak nëna e kanë. Sado leksione të marrim, nuk vlejnë për gjë sepse asgjë nuk mund të të përgatisë siç duhet për këtë përvojë”, shpjegoi Kate duke prezantuar dokumentarin “Out of the blue”, i cili fokusohet te shqetësimet mendore që mund të prekin nënat në muajt e parë pas lindjes.
“Emocionet që ndien gjatë kësaj periudhe janë vërtet të shumta e të ndryshme; ndihesh e gëzuar, e lodhur, e shqetësuar, por gjithmonë ke dashuri për të dhënë. Të ndryshon edhe identiteti, nga mendimet që kishe vetëm për veten, tashmë në plan të parë janë fëmijët. Këshillat për t’i kapërcyer kohët e para janë të kota, duhet vetëm të fokusohesh te familja e të bësh më të mirën e mundshme. Kjo nuk është e thjeshtë në çdo rast, por duhet të keni në mend që shpejt do të kalojë. Kërkoni ndihmë nëse ju nevojitet, mos e konsideroni dobësi sepse jeni mjaft të ngarkuara dhe keni shumë përgjegjësi të reja. Të gjithë duhet të luftojnë që të jenë mbështetës në këtë fazë të vështirë të jetës”, përfundon dukesha.
