Përhapja e koronavirusit me një ritëm të lartë në vendin tonë duket se ka ndikuar edhe në vendimin e Zyrës Federale të Shëndetit Publik në Zvicër.
Sipas albinfo.ch zyra e shëndetit publik ka bërë ditën e sotme riaktualizimin e listës së karantinës dhe atë të vendeve me rrezik.
Kësaj liste tani i është shtuar edhe vendi ynë për shkak të numrit të lartë të viktimave dhe të infektuarve nga COVID-19.Deri më tani Shqipëria ka qenë i vetmi vend i Ballkanit Perëndimor jashtë kësaj liste me rrezik.
Kushdo që hyn në Zvicër duhet të karantinohet për dhjetë ditë. Ndryshimi do të hyjë në fuqi të enjten, 20 gusht 2020, ka njoftuar zyra e shëndetit publik sot.
Përveç destinacioneve të njohura të udhëtimit si SH.B.A, Meksika, Republika Dominikane dhe Afrika e Jugut, në këtë listë janë edhe disa vende të Evropës Lindore si Kosova, Mali i Zi, Maqedonia e Veriut dhe Bosnja dhe Hercegovina.
Kujtojmë se sot u raportua për dy humbje jete nga Covid-19 duke e çuar në 232 numrin total të jetëve të humbura që nga fillimi i pandemisë. Dhe u raportua për 155 raste të reja, rekordi më i ri që nga fillimi i pandemisë. /gazetareforma
