Nënpresidentja e Shteteve të Bashkuara, Kamala Harris konsolidoi me shpejtësi të hënën mbështetjen e demokratëve, përfshirë nga figurat kryesore të partisë, për kandidaturën e saj presidenciale, duke siguruar përkrahjen e qindra delegatëve të Kuvendit dhe duke njoftuar për grumbullimin e një sasie masive fondesh, pasi Presidenti Joe Biden u largua papritur nga gara.
Duke folur para ekipit të fushatës presidenciale në Uilmington të Delauerës, Harris e pranoi se javët e fundit kishin qenë intensive, por shprehu besimin tek ky ekip.
“Objektivi im është të fitoj emërimin dhe të fitoj në zgjedhje”, tha ajo. Ajo premtoi “të bashkojë partinë Demokrate, të bashkojë vendin dhe të fitojë zgjedhjet.”
Ajo përmendi temat qendrore që do të spikasin në fushatën e saj kundër Trump gjatë 100 ditëve të ardhshme, duke vënë në dukje kontrastin mes saj si ish-prokurore dhe ish-Presidentit që përballet me probleme të shumta ligjore.
Biden thotë se misioni i fushatës nuk ka ndryshuar dhe premtoi se do të bëjë fushatë për Harris
“Ishte gjëja e duhur”, tha Biden lidhur me vendimin e tij për të dalë nga gara.
Harris po siguron me shpejtësi mbështetjen e demokratëve. Ligjvënësja demokrate Nancy Pelosi, ish-Kryetare e Dhomës së Përfaqësuesve dhe një zë me ndikim i Partisë Demokratike, mbështeti të hënën emërimin Harris si kandidate për presidente të kësaj partie, duke u bërë e fundit mes një vale demokratësh me peshë që e bënë një gjë të tillë.
Fushata e Harris tha se ka mbledhur 81 milionë dollarë në 24 orët pas largimit të Biden, shifra më e lartë për një ditë të vetme deri tani në fushatën për zgjedhjet e këtij viti për secilën palë.
Pothuaj se të gjithë demokratët me ndikim, të cilët janë konsideruar si rivalë të mundshëm të Harris kanë ofruar përkrahjen e tyre për të, përfshirë guvernatoren e Miçiganit Gretchen Whitmer, të Kalifornisë Gavin Newsom dhe Andy Beshear nga Kentaki.
