Kryebashkiaku i Tiranës ka promovuar një nismë të re për pensionistët, në mënyrë që ata të konsumojnë kafen 20 lekë në disa nga kafenetë e qytetit.
“Kafe me gjyshin”, ose me gjyshen është një rrjet kafenesh në të gjithë Tiranën që nga ora 7 deri në orën 9 të mëngjesit do ta shërbejnë kafen me 20 lekë, për të ndihmuar të gjithë ata që janë pensionistë”, – tha Veliaj për mediat.
Nga kjo nismë do të përfitojnë të gjithë pensionistët. Kësaj nisme i janë bashkuar fillimisht një rrjet prej 100 lokalesh në gjithë kryeqytetin.
“Mjafton që dikush të tregojë librezën e pensionit dhe i gjithë rrjeti i kafeve ku është vendosur tabela “Kafe me gjyshin” do të jetë një vend ku kafja do të kushtojë 20 lekë. Aty mund të konsumohet shtypi i ditës edhe sigurisht bisedat e para të ditës me secilin. Ne do të kemi një rrjet prej 100 kafenesh në të gjithë Tiranën që do të jenë pjesë e kësaj nisme”, tha kryebashkiaku.
