Eugent Bushpepa me këngën “Mall” është shpallur fitues i edicionit të 56-të të Festivalit të Këngës në Radio Televisionin Shqiptar.
Emri më i lakuar për fitoren e çmimit të parë, edhe këtë herë nuk ka dalë jashtë parashikimeve. Juliana Pasha e shpalli këtë këngë fituese që para një jave, madje i uroi fitore në Eurosong.
Me një performancë të shkëlqyer “live”, Genti u votua nga juria profesioniste e festivalit e përbërë nga Markelian Kapidani, Luan Zhegu, Ben Andoni, Sokol Marsi, Edmond Rapi, por arriti të rrëmbente edhe duartrokitjet e publikut, të cilët e rikthyen dy herë në skenë këngëtarin.
“Shumë faleminderit. Do doja të falenderoja Radio Televizionin Shqiptar dhe jurinë profesioniste. Do mundohem që t’ju përfaqësoj denjësisht.” , u shpreh i emocionuar Bushpepa.
Çmimin e dytë të festivalit fitoi Redon Makashi me “Ekziston” dhe çmimin e tretë “Piedestal” nga Inis Neziri.
E ftuara e nderit këtë finale ishte këngëtarja Elsa Lila, e cila u rikthye në skenën e festivalit të RTSH pas 9 vitesh.
“Mall” do të jetë kënga që do të përfaqësojë Shqipërinë në “Eurovizion 2018” që do të mbahet në Lisbonë të Portugalisë në datat 8-12 maj.
