Kur keni qenë në shkollë të mesme mund të keni bërë shumë gjëra që as nuk i kishit menduar më parë, të cilat i konsideronit si zgjedhje të zgjuara, siç ishte të përdorje një kod fjalësh për të shkruar poema për djalin që kishe qejf, të kishe një lidhëse flokësh me ngjyra të ndryshme për çdo klasë, apo të vendosje pastë dhëmbësh në puçrrat e tua në mënyrë që ato të largoheshin sa më shpejtë.
Nëse nga kjo lloj poezie njerëzit heqin dorë që në klasën e shtatë, kur vjen puna te hileja e pastës ende shumë prej nesh (përfshirë edhe mua) betohemi e stërbetohemi se është trajtimi i përkryer. Lind pyetja: A është vërtet zgjidhja e duhur?
“Pasta e dhëmbëve është përdorur historikisht si një ilaç popullor, nëse mund të shprehemi kështu për shkak se shumica e tyre përmban një përbërës, triclosan- in, një kundërbakterial që vret bakterin përgjegjës për aknet në fytyrë.”, thotë Joshua Zeichner, drejtor i klinikës kozmetike dhe kërkimeve shkencore dermatologjike në spitalin Mount Sinai, New York.
Mirëpo dr. Joshua thotë se pavarësisht kësaj, në shumë studime është parë një lidhje midis triclosan- it dhe çrregullimeve hormonale, arsye kjo përse shumë pasta dhëmbësh po mundohet ta heqin përbërësin në fjalë nga formula e tyre. Edhe nëse kjo ndodh, pasta e dhëmbëve do të vazhdojë t’ju bëjë punë, të paktën në sipërfaqe për shkak të sodës së bukës dhe alkoolit që përmban.
“Pasta mund të ketë një efekt përtharës duke ulur kështu sipërfaqen e një puçrre të acaruar . Tingëllon fantastike? Në fakt jo: përqendrimi i këtyre përbërësve është shumë më i lartë dhe më i ashpër për lëkurën. Pasta është ideuar për të larë dhëmbët, ndaj nëse e përdorni në lëkurë do t’ju irritojë, thajë dhe plasaritë lëkurën. E gjitha kjo të çon në një reaksion zinxhir të pakëndshëm. Lëkura e prirur ndaj akneve do të reagojë ndaj thatësirës dhe acarimit duke prodhuar më shumë akne. Kështu, teksa mundoheni të mbuloni dhe mbyllni një puçërr, hapni kushedi sa e sa të tjera.”, thotë Joshua Zeichner .
Nëse jeni të dëshpëruar dhe nuk keni zgjidhje tjetër dhe pasta e dhëmbëve është opsioni juaj i vetëm, të paktën sigurohuni që formula të mos ketë zbardhues shtesë apo ngjyrues për të shmangur sa më shumë irritimin.
Burimi: Women’s Health
