Nisur nga numri i banorëve dhe ritmi i gjallë i jetës, gjerësisht thuhet se qarku i Tiranës është më i prekuri sa i takon pandemisë Covid-19. Por në një postim në Facebook, epidemiologu skeptik Ilir Alimehmeti, përmes një analize të shifrave, të cilat publikohen në çdo përditësim ditor nga ana e Ministrisë së Shëndetësisë deklaron se në fakt qarku më i infektuar është një tjetër.
Nëse të dhënat shprehen për çdo 100.000 banorë, Alimehmeti deklaron se Gjirokastra shënon numrin më të lartë të rasteve të reja, duke e konsideruar pretendimin për Tiranën si të rremë.
“❗Vini re se si tashmë numrin më të lartë e ka Gjirokastra dhe Tirana del në vend të dytë”, shkruan specialisti.
Kështu pra, vendin e parë e mban Gjirokastra me 3616 raste për 100 mijë banorë dhe në vend të dytë është Tirana me 3366 raste, po për 100 mijë banorë.
Më tej, Alimehmeti vazhdon:
“? Eshtë krijuar përshtypja e rreme se Tirana ka numrin më të lartë të rasteve dhe të vdekshmërisë. Kjo është pjesërisht e kuptueshme, sepse është qarku me numrin më të lartë të popullsisë dhe me dendësinë më të lartë të saj, por VETËM PJESËRISHT!”
Përgjatë këtyre muajve, postimet e epidemiologut kanë rrëmbyer jo pak herë vëmendjen mediatike sa i takon opinioneve të tij ndaj vaksinës apo testimeve masive.
