Rënia e lindjeve në vend vitet e fundit ka qenë e dukshme në të dhënat e INSTAT-it. Dhe si për t’i dhënë një shtysë familjeve shqiptare, kryeministri Edi Rama vendos që të rrisë shpërblimin për çdo bebe që sillet në jetë.
Nga 1 janari shpërblimi jo vetëm që do të rritet, por përfitimet do të variojnë në bazë të numrit të fëmijëve që një çift sjell në jetë.
Rama u shpreh se fëmijë i parë i një çifti do të marrë 400 mijë lekë të vjetra, fëmija i dytë, 800 mijë lekë të vjetra dhe fëmija i tretë 1 milion e 200 mijë lekë të vjetra.
“Më e bukura është ajo që do të bëjmë për fëmijët e sapolindur në vend. Në vitet 2000 pata lançuar si kryetar i bashkisë, çekun e bebes, 50 mijë lekë të vjetra, që u prit shumë mirë, por mbeti aq për shumë e shumë vite. Madje u kthye në problem dhe në malin e borxheve nga qeveria e mëparshme kishim edhe borxh 5 milionë dollarë për bebet që nuk kishin marrë çekun, por e shlyem.
Që nga 1 janari i vitit të ardhshëm, çdo fëmijë i parë i një çifti do të marrë 8-fishin e kontributit, 400 mijë lekë të vjetra, fëmija i dytë, 800 mijë lekë të vjetra dhe fëmija i tretë 1 milion e 200 mijë lekë të vjetra. Çdo bebe që lind në maternitetet e vendit do të regjistrohet aty, nuk do të jetë për të bërë gjithë procedurën e komplikuar në gjendjen civile aty dhe do të marrë menjëherë çekun”, u shpreh kreu i qeverisë.
