Pavarësisht se je student, çift i ri apo ke ardhur nga qytetet e tjera të vendit, të gjithëve u bashkon një pengesë: gjetja e një shtëpie me qira, me një çmim të leverdishëm. Por nga ana tjetër, një problem i tillë qëndron edhe për të huajt, të cilët kanë vendosur që të punësohen në Shqipëri. Sipas të dhënave zyrtare nga Shërbimi Kombëtar i Punësimit, në vitin 2016 në Tiranë kishte 495 të huaj, të cilët u pajisën me leje punësimi.
Për këtë arsye, EUROSTAT publikon një anketë të veçantë të përvitshme për tregun e qirave, me qëllim krahasimin me Brukselin.
Sipas të dhënave, çmimet janë rritur për apartamentet e vogla dhe kanë rënë për vilat.
Gjatë 2017-s, çmimet mesatare për apartamentet 1+1 u rritën nga 330 në 350 euro për metër katror, me një rritje në vlerë absolute prej 20 eurosh.
Rritje të çmimit mesatar gjatë 2017-s kishte dhe për apartamentet 2+1. Sipas të dhënave të grumbulluara gjatë 2017-s, çmimet ishin 520 euro, nga 510 euro që ishin një vit më parë, me një diferencë prej 10 eurosh.
Në ndryshim nga banesat me sipërfaqe të vogël, hapësirat e banimit me sipërfaqe më të madhe kanë pësuar rënie. Sipas të dhënave të Anketës së EUROSTAT, çmimet e qirave për apartamente 3+1 kanë rënë me rreth 10 euro.
Rënien më të madhe e kanë pësuar vilat, apo shtëpitë private. Në 2017-n, qiratë mesatare mujore për vilat ishin 1350, rreth 100 euro më pak se në vitin 2016. Arsyeja kryesore e rënies së qirave të vilave, sipas ekspertëve të fushës është amortizimi më i shpejtë i tyre.
Burimi: Monitor
