Agjencia Meteorologjike e Japonisë ka lëshuar një paralajmërim për cunami të premten, pasi një tërmet i fortë me magnitudë 6.7 goditi pjesën verilindore të vendit, duke shkaktuar shqetësim në zonat bregdetare. Sipas autoriteteve, ekziston rreziku i dallgëve të larta deri në një metër, ndaj banorët janë këshilluar të largohen nga zonat pranë detit dhe të qëndrojnë vigjilentë.
Tërmeti është regjistruar në orën 17:03 sipas kohës lokale (1:03 të mëngjesit me orën e Evropës), pranë prefekturës Iwate, një rajon që shpesh ndikohet nga aktiviteti sizmik. Japonia ndodhet mbi të ashtuquajturën “Unazë e Zjarrit” të Paqësorit, një zonë me aktivitet të lartë sizmik dhe vullkanik, çka e bën vendin të predispozuar për tërmete të shpeshta.
Agjencia Meteorologjike tha se edhe pse nuk ka raportime për dëme të menjëhershme apo të lënduar, paralajmërimi për cunami mbetet në fuqi si masë paraprake sigurie. Transmetuesi publik NHK njoftoi se autoritetet lokale po u kërkojnë banorëve që të qëndrojnë larg porteve, brigjeve dhe zonave të ulëta, deri kur situata të vlerësohet plotësisht.
Kjo ngjarje vjen vetëm pak ditë pasi Japonia lëshoi një paralajmërim të ngjashëm për të njëjtin rajon. Prefektura Iwate është mes zonave që kanë përjetuar historikisht goditje të rënda nga cunamet, përfshirë tragjedinë e vitit 2011, që shkaktoi mijëra viktima dhe dëme të mëdha.
Ekspertët theksojnë se edhe një cunami i vogël mund të jetë i rrezikshëm, pasi valët mund të përforcohen ndërsa afrohen drejt bregut.
Autoritetet u bëjnë thirrje qytetarëve të ndjekin njoftimet zyrtare, të qëndrojnë të qetë, por vigjilentë.
