Sot është ditëlindja e Amy Winehouse, ndërsa bota e muzikës prej pesë vitesh po përjeton humbjen e saj.
Këngëtarja ka lindur me 14 shtator 1983 në Londër, ndërsa ndërroi jetë në vitin 2011-të, në moshën 27-vjeçare, vetëm pesë vite pasi arriti majën e karrierës muzikore.
Lidhur me këtë datë, sot do të hapet një ekspozitë me fotografi të panjohura më parë, krejt të reja, që fotografi Phil Knott ka realizuar me këngëtaren.
Ekspozita hapet në Zebra One Gallery në Londër, ndërsa mbledhja e fondeve do t’i shkojë fondacionit që mban emrin e këngëtares.
Repertori i saj muzikor shkonte nga R&B deri tek Jazz. Me albumin e saj “Back to Black” në vitin 2006, Amy arriti një famë botërore dhe fitoi pesë çmime Grammy.
Ekspozita do të qëndrojë e hapur për më shumë se 30 ditë, me fotografitë që duket se kapin momente të këngëtares në periudha të ndryshme të jetës së saj, nga fillimet e saj. Vetë fotografi Knott ka përshkruar secilën nga fotografitë e ekspozitës, duke treguar rrugëtimin që ka bërë Amy, me ëndrrën e saj që u thye në mes kur ajo nisi të abuzonte me drogën deri në fundin tragjik.
Më herët kur fotografi Phil Knott publikoi fotot e saj, nga koha kur këngëtarja nuk ishte ende e famshme, tha: “Kjo ishte argëtuesja, e shëndetshmja dhe e jashtëzakonshmja Amy, që unë kujtoj dhe që kam kapur në ato fillim vite. Kur nxora në dritë këtë kuti me fotosh, pasi u zhvendosa në Los Angeles, u preka se sa shumë shpresë, bukuri dhe druajtje të pafajshme gjeta në to”.
*Shfleto galerinë
Burimi: Daily Mail
