Vetëm Çmimi Nobel për Letërsi ka mbetur ende pa një datë të caktuar. Akademia suedeze ende nuk e ka shpallur datën e ndarjes së Çmimit Nobel në Letërsi, ndërkohë që shpresat për shkrimtarin shqiptar po shtohen, sepse nga viti në vit po vjen duke u ngushtuar edhe nga fusha e rivalitetit.
Faqet e specializuara britanike të basteve e kanë radhitur shkrimtarin shqiptar në mesin e 5 më të preferuarve për vitin 2016.
Janë po këto lista që një vit më parë kishin radhitur në vendin e katërt fituesen e Nobelit 2015, Svetlana Alexievich, deri në atë kohë një emër jo shumë i njohur, botërisht. Në krye të listës, ashtu si dhe vitin e kaluar është shkrimtari japonez, Haruki Murakami. Ai ndiqet në këtë listë nga Adonis, poeti sirian, që jeton në Paris. Në vendin e tretë vjen Ngugi Wa Thongo dhe i katërti është Philip Roth, edhe ky një kandidat që prej vitesh është në krye të listës së Ladbrokes.
I pesti renditet Ismail Kadare, i cili një vit më parë renditej i 7-ti. Shkrimtari shqiptar deri më sot është nderuar me disa nga çmimet më prestigjioze në botë, për letërsinë, si “Man Booker Prize” e më gjerë. Tre nga emrat më të përfolur nga mediat botërore janë: Haruki Murakami, Adonis dhe Ismail Kadare.
