Në mes të panikut për përhapjen e gjerë të virusit dhe pamundësisë së institucioneve për testime dhe gjurmime të rrepta të COVID-19, ministrja e Shëndetësisë ka premtuar fuqizimin e kapaciteteve laboratorike në vend.
Pak kohë më parë, ISHP i drejtohej me një shkresë zyrtare ministrisë ku i njoftohet pamundësia për testim në shkallë në gjerë. Por kjo situatë duket se ka marrë zgjidhje pasi Ogerta Manastirliu u shpreh sot se janë “mbi 90 mijë teste në dizpocion të Insitutit të Shëndetit Publik për identifikimin e rasteve të reja me COVID-19 në vendin tonë”.
Gjatë vizitës në Institutin e Shëndetit Publik, ku pritet që së shpejt të instalohet një aparaturë e re testimi, ajo tha se do të vijojë fuqizimi i kapaciteteve laboratorike në vend.
“Më shumë se 90 mijë teste janë të disponueshme në Institutin e Shëndetit Publik dhe do të vijojë fuqizimi i kapaciteteve laboratorike, qoftë nëpërmjet numrit të testeve, kiteve të laboratorit, gjithashtu dhe fuqizimit me aparatura të reja për ta fuqizuar këtë laborator për të përballuar atë që mund të vijë nesër. Çfarë është e rendësishme është që ne kemi një plan, kemi një strategji për forcimin e laboratorit të ISHP-së, por edhe për fuqizimin e laboratorit të QSUT-së. Gjithashtu kemi dhe një plan më afatgjatë në raport me testimin edhe në raport me gjurminin dhe hetimin epidemiologjik”, tha Manastirliu.
Së shpejti fillon punën dhe laboratori i dytë në QSUT për testimet molekulare, ndaj Manastirliu shtoi se kërkohet bashkëpunimi i të gjithëve.
“Është shumë e rëndësishme në këtë fazë bashkëpunimi i qytetarëve. Është një strategji që ka rezultuar shumë efikase deri tani, por është një strategji që kërkon bashkëpunimin e të gjithëve”, u shpreh Manastirliu.
Ministrja theksoi se do të vijohet me komunikimin e riskut që kanë qytetarët në mënyrë që ata, mbi të gjitha të dinë që nëse mbrohen vetë, mbrojnë dhe të tjerët që kanë pranë.
